12
1 एपरैम*इसरायली मनखे ह हवा ला खाथे;
ओह पूरा दिन पूरब के हवा के पीछा करथे
अऊ अपन लबारी गोठ अऊ हिंसा ला बढ़ावत रहिथे।
ओह अस्सूर देस के संग करार करथे
अऊ मिसर देस ला जैतून के तेल पठोथे।
2 यहूदा के बिरूध यहोवा के आरोप हे;
ओह याकूब†याकूब के मतलब होथे ओह एड़ी ला धरथे, या ओह फायदा उठाथे या ओह धोखा देथे ला ओकर चालचलन के मुताबिक सजा दीही
अऊ ओकर काममन के मुताबिक ओला बदला दीही।
3 अपन दाई के कोख ही म, ओह अपन भाई के एड़ी ला पकड़ ले रिहिस;
एक मनखे के रूप म ओह परमेसर के संग लड़िस।‡देखव उत 25:26; 32:24
4 ओह स्वरगदूत के संग लड़िस अऊ स्वरगदूत ऊपर जय पाईस;
ओह रोईस अऊ ओकर ले किरपा करे बर बिनती करिस।
बेतेल म ओह परमेसर ले मिलिस
अऊ उहां ओह ओकर ले गोठियाईस—
5 यहोवा, सर्वसक्तिमान परमेसर,
यहोवा ओकर नांव अय।
6 पर ये जरूरी अय कि तें अपन परमेसर करा लहुंट आ;
मया अऊ नियाय के काम करते रह,
अऊ हमेसा अपन परमेसर ऊपर भरोसा रख।
7 बेपारी ह नाप-तौल म बेईमानी करथे
अऊ छल-कपट करई ओला बने लगथे।
8 एपरैम ह ये घमंड करथे,
“मेंह बहुंत धनवान अंव, मेंह धनी हो गे हवंव।
मोर जम्मो संपत्ति के संग ओमन
मोर म कोनो अपराध या पाप नइं पाहीं।”
9 “जब ले तेंह मिसर देस ले निकलके आय
में यहोवा तोर परमेसर अंव;
मेंह फेर तोला तम्बूमन म बसाहूं,
जइसन कि तुम्हर ठहिराय तिहार के दिनमन म होवत रिहिस।
10 मेंह अगमजानीमन ले गोठियांय,
ओमन ला कतको दरसन देखांय
अऊ ओमन के जरिये पटंतर कहेंव।”
11 का गिलाद सहर ह दुस्ट ए?
येकर मनखेमन बेकार अंय!
का ओमन गिलगाल म बईलामन के बलिदान करथें?
ओमन के बेदीमन जोते गय खेत म
पथरामन के ढेर सहीं होहीं।
12 याकूब ह अराम देस ला भाग गीस;
इसरायल ह एक घरवाली पाय बर सेवा करिस,
अऊ ओकर दाम चुकाय बर ओह भेड़मन ला चराईस।
13 यहोवा ह इसरायल ला मिसर ले निकाले बर एक अगमजानी के उपयोग करिस,
एक अगमजानी के दुवारा ओह ओकर खियाल रखिस।
14 पर एपरैम ह यहोवा के कोरोध ला बहुंत भड़काय हवय;
ओकर परभू ह ओकर दुवारा करे गय खून के दोस ओकरे ऊपर रहन दीही
अऊ ओकर अनादर करे के कारन ओकर ले बदला लीही।