5
1 Israel ke sab se barka agwa ek iensaan hai djaun Parmeswar dwaara tjoenal hai aur djaatie ke darie par oke koetjh daan dewe hai aur paap mietaawe khaatien baliedaan kare hai. 2 Djab koi Parmeswar ke baat na thiek se djaane hai aur bhatke hai, tab agwa oke daaja kar sake hai. Ohoe to poera na hai. 3 Ohie se oke na khaalie djaatie log ke paap khaatien baliedaan kare ke parie, bakie bhie aapan paap khaatien. 4 Koi kabhie na apane ke sab se barka agwa banaai sake hai. Ie oetja dardja khaalie Parmeswar dei sake hai, djaise oe Aaron* Israel ke djaat ke ek sab se barka agwa raha, aur Aaron pahiela waala raha. ke bhie deis raha. 5 Aur Kriest bhie na aapan aadar ke biese me sotjke apane ke sab se barka Agwa banaais. Bakie Parmeswar aise karies djab oe ose bolies kie:
„Toe hamaar Beta baate, aadj ham sab koi ke djanaaila kie ham tor Baap baatie.”
6 Aur oe bhie bolies kie:
„Toe djaise Melkiesedek sada khaatien agwa rahiehe.”
7 Djab Jiesoe doenia par aapan djiewan iensaan ghat bietaawat raha, tab oe roi-roike praatna karke Pieta Parmeswar ke gohoraawat raha. Oe to oke maut me se batjaai sakat. Oe khaalie maangat raha aapan Baap ke hiettjha poera kare, ohie se Parmeswar okar praatna soenies aur okar dar doer kar deis. 8 Aisane, oe tjaahe Parmeswar ke Beta hai, tabbo oe doekh sahe ke dwaara siekhies hai aapan Baap ke baat maane ke. 9 Ab oe aapan sab kaam poera karke sada ke lieje batjaawe hai dje okar baat soene hai. 10 Aur Parmeswar oke djaise Melkiesedek sab se barka agwa ghat baithaais hai.
Parmeswar ke baat djaise doedh aur khaaik hai
11 Hamlog Melkiesedek ke biese me dher baat bataai sakab, bakie toelog etana patjhar gaile hai kie moeskiel hai ie sab baat samdjhaawe ke. 12 Toelog dher dien se Jiesoe ke rasta par tjale hai, tabbo abbe lek toelog ek doesare ke na siekhaai paawe hai. Toelogke tjaahie Parmeswar ke baat abbe soeroe se siekhe ke. Ie pahiela baat djaise doedh hai aur toelog djaise tjhota larkan baate djaun khaalie doedh pieje hai. Toelog ab talak karer khaaik na khaai paawe hai. 13 Dje doedh pieje hai, oe Parmeswar ke baat pakka iesaai ghat abbe na samadjh paawe hai. 14 Pakka iesaai to karer khaaik kha hai. Ekar matlab hai kie oelog djab koetjh soene hai, tab thiek se bietjaar kar sake hai kie attjha hai kie na.