9
Paulas ke sotj
1-2 Tabbo ek tjiedj hamme bahoet tjienta dewe hai. Hamaar diel raat dien kalpe hai. Ham Kriest me saamiel baatie, aur ham djhoeth na boliela. Ham aapan man me djaaniela kie ie satj baat hai aur Pawietr Aatma epar aapan haamie bhare hai. Hamme bahoet sotj hai kie hamaar Israel ke djaatie log Kriest Jiesoe me na bieswaas kare hai. 3 Djab hoi sakat tab ham Kriest se alag karal djaitie djab ham ekare dwaara aapan djaatie ke Parmeswar ke sadja me se batjaai saktie. 4 Dher dien baad Parmeswar Israel ke djaatie log ke tjoenke aapan betwan banaais hai. Oesab okar biesaal maahaanta dekhies hai aur djaane hai kie oe oesabse kaun baat-tjiet karies hai. Oesab Mosas dwaara okar kaanoen paais hai, aur oelog bhie siekhies hai kaise Parmeswar ke aadar kare ke tjaahie. Oelog djaane hai kie oe kaun barhia tjiedj waada karies hai. 5 Oesabke baap-daada log ke bieswaas bahoet barka raha. Aur Parmeswar ke tjoenal waala Kriest ek iensaan ghat ohie djaatie me se oetpan bhail hai. Oe sab se maahaan waala Parmeswar hai aur sab koi ke tjaahie hardam ke lieje okar aadar kare ke. Ha, aisahie to hai!
6 Ka, Parmeswar aapan baat aapan djaatie khaatien toer deis hai? Ie to kabhie na hoi sake hai. Bakie na sab Israel*Israel Jaakob ke doesara naam hai. ke aulaad Parmeswar ke sattja djaatie log hai. 7 Tjaahe Aabraaham oesabke baap-daada raha, tabbo Parmeswar oke waada na karies raha kie oelog sab koi okar aulaad rahie. Na, oe bolies raha kie khaalie okar beta Iesaak ke aulaad me gientie hai. 8-9 Parmeswar to Aabraaham ke khaalie Iesaak ke biese me waada deis hai. Oe bolies kie: „Ek baries baad djab ham lautke aabe, tab tor aurat Saara ke ekgo beta rahiega.” Ekar matlab hai kie Parmeswar na sab Aabraaham ke larkan ke aapan larkan banaais hai, bakie khaalie djaun ke oe waada karies raha.
10 Aisane bhie bhail Rebeka ke larkan se. Oke djora betwan paida bhail. Ie doeno hamlogke baap-daada Iesaak ke larkan raha, tabbo oman se khaalie ekgo tjoenal gail. 11-13 Aur paida howe se pahiele Parmeswar oelogke maai se bol deis raha kie: „Barkwa tjhotkwa ke kamkarta rahiega.” Aisane Parmeswar aapan poestak me ie djora ke biese me liekhwaais raha kie: „Ham Jaakob ke tjaahiela aur na Esau ke.” Tjaahe larkan abbe na paida bhail raha, aur attjha kie kharaab kaam na karies raha, tabbo Parmeswar ekgo ke tjoen tjoekal raha. Ekare dwaara safa se dekha hai kie ek iensaan na aapan barhia kaam dwaara Parmeswar ke larka hoi sake hai, bakie khaalie djab Parmeswar oke bolaawe hai.
Parmeswar ke bhalaai Parmeswar ke bhalaai hai
14 Tab ka, Parmeswar doei aakhie se kaam kare hai? Na, tanko na! 15 Oe to Mosas se bolies raha kie: „Djab ham koi ke daaja karab, tab oke daaja karab. Aur djab ham maangiela koi ke bhalaai kare, tab ham okar bhalaai karab.” 16 Ohie se djab koi bahoet maange hai aur kausies kare hai Parmeswar ke larka howe khaatien, tab ie koetjh na hai. Parmeswar iensaan logan ke khaalie aapan daaja se tjoene hai. 17 Okar poestak me liekhal hai kie oe Egypte des ke raadja se bolies kie: „Tjaahe toe hamaar baat na soene hai, tabbo ham toke raadja ghat tjhor deilie hai aur maut talak na pahoetjailie. Ham toke kaam me laabe aapan saktie dekhaawe khaat djeme doenia bhar thiek se djaan djaai kie ham Ke baatie.” 18 Ie sab baat se dekha hai kie Parmeswar iensaan ke daaja kare hai kie to thetharai karan dewe hai dje ke oe maange hai.
19 Saait koi hamse poetjhiega: „Djab aise hai, tab Parmeswar kaahe ke hamme kasoerie maane hai djab ham thetharai kariela aur okar baat na soeniela? Oe to aisahie maangat raha.” 20 Tab ham bolab: „Toe ke baate, Parmeswar se moeh tjalaawe waala?” Ek bartan aapan banaawe waala se thoro boliega: „Toe hamme kaahe ke aise banaile hai?” 21 Ek pandohie mattie se ek barhia gogliet kie to har ek rakam doesar tjiedj banaai sake hai djaise oe maangie. 22 Aisahie djab Parmeswar maange hai aapan goessa dekhaawe aur aapan saktie djanaawe, tab oe manai log se kar sakiega djaise oke barhia lage hai. Aur tjaahe oesab naas kare laaik ke hai, tabbo oe bahoet santokh se oelogke kharaab tjalaawa sahies hai.
23 Oe aise karies koetjh manai log ke aapan maahaanta dekhaawe khaatien. Oelog dekhe hai kaise oe oesabke daaja kare hai aur tajaar kare hai aapan biesaal soekh me bhaag lewe khaatien. 24 Aur oe manai hamlog baatie djaun Jiesoe me bieswaas kare hai. Oe hamlogke tjoenies hai, na khaalie Israel ke djaatie me se, bakie doesar djaatie me se bhie. 25 Okar sanesia Hosea liekhies raha kie Parmeswar bolies:
„Djaun log hamaar djaatie na raha, ham oesabke aapan djaatie bolaabe! Aur dje ke ham pjaar na karat rahielie, ham oelogke pjaar karabe.”
26 Djaaha oe manai log se bolies raha kie: „Toelog hamaar djaatie na baate,” hoewa par oesab djienda waala Parmeswar ke betwan bolaawal djaaiga.
27 Bakie Israel ke biese me Parmeswar ke sanesia Jasaaja djor se bolies kie:
„Tjaahe dher Israel ke djaatie log rahiega, djaise samoendar ke kienaare ke baaloe, tabbo oelog me se kamtie manai Parmeswar ke goessa me se batjiega.”
28 Dher dien na rahie gail hai kie oe doenia par aapan baat halieje se poera kariega. 29 Jasaaja bhie agwe se bolies raha kie:
„Djab maahaan Parmeswar koetjh Israel log ke na batjaawat, tab hamlog sab koi djaise Sodom aur Gomora sahar ke djaatie log maraai djaitie.”
Kaise Israel ke djaatie bhatak gail
30 Ie sab baat dwaara hamlog kaun tjiedj siekh sakiela? Ekwa djaatie log kausies na karat raha Parmeswar se ek howe khaatien. Bakie tabbo djab oelog me se koetjh manai Jiesoe Kriest me bieswaas kare lagal, tab oelog be-kasoerie aur Parmeswar se ek bhail. 31 Bakie Israel ke djaatie log bahoet kausies karat raha Parmeswar ke kaanoen pakarle rahe ke dwaara ose ek howe khaatien, aur tabbo oesab na kar paais. 32 Oelog kaahe ke na kar paais? Oesab Jiesoe me bieswaas na karat raha bakie sotjat raha kie oelog aapan barhia tjaal-tjalan dwaara Parmeswar se ek hoi paawat. Oesab ek manai ghat hai djaun tjalat me ek ieta ke na dekhies aur gier gail. Aapan be-bieswaas dwaara oesab Parmeswar ke rasta par gier gail hai. 33 Parmeswar aapan poestak me Jiesoe Kriest ke biese me to liekhwaais raha kie:
„Dekh, ham Sion†Hia par Sion sahar ke matlab Israel ke djaatie hai. sahar me ekgo ieta dharab, aur dher manai log thokar maarie aur okar oeppar goessaai djaai. Bakie dje okare me bieswaas kariega, oke na pastaaike pariega.”