1 हे वार्टुरा अदिक आकतींगेरा, ना नीम से ई रीति देल मातगोळ माळ सकिदील ह्यांग कि आत्मिक लॉकुर से, लेकीन ह्यांग कि दुनिया अन लॉकुर से, अदिक आंदुर से जो मसीह दा चिकोर आर. 2 ✡इब्रानिगोळ ५:१२,१३ना नीमी हाल कुळ्सदीन, अनाज तिनसिदील; यतिकी नीव अदरी पचुस ईला सकीर; सही दा नीव ईगास ताका अदरी पचुस सकालीर, 3 यतिकी नीव ईगास ताका दुनिया अन लॉकुर घाई आईर. यागासताका नीम दा मतभेद अदिक झगळा आद, रा येन नीव ई दुनिया नोर आल्लच? अदिक येन मंळसा अन्द रीति मा नळालीर? 4 ✡१ कुरिन्थि १:१२यतिकी याग पयला अनतान, “ना पौलुस उन हुईन,” अदिक दुसरा अनतान, “ना अपुल्लोस उन हुईन,” रा येन नीव दुनिया अन मंळसागोळ्द घाई जीऊस सकालीर?

5 येन हुन अपुल्लोस? अदिक येन हुन पौलुस? सिर्फ सेवक, याऊन द्वारा नीव विश्वास माळदीर, ह्यांग हर ऊंद मंळसा अक प्रभु सौप्सदुन हांग आंदुर क्याल्सा माळ पायजे. 6 ✡प्रेरितगोळ १८:४-११; प्रेरितगोळ १८:२४-२८ना हचदीन, अपुल्लोस सिचुसदुन, लेकीन परमेश्वर वाळुसदुन. 7 इदुरसाटी ना हचावाळा येनारा आन अदिक अदरी सिचावाळा, लेकीन परमेश्वर अच सप्पा येनारा आन जो वाळुसावाळा आन. 8 हचावाळा अदिक सिचावाळा येढ्ढु ऊंद सारखा आर; लेकीन हर ऊंद मंळसा अक तान अच मेहनत इन अनुसार आऊक परमेश्वर आऊन क्याल्सा अन्द अनुसार आऊक मजदूरी कोट्टान. 9 यतिकी नाव परमेश्वर उन सहकर्मी आयेव; नीव परमेश्वर उन केई

अदिक परमेश्वर उन रचना हुईर. 10 परमेश्वर उन आ अनुग्रह अन्द अनुसार जो नानी कोटकु आग्याद, ना बुद्धिमान राजमिस्त्री इन घाई पायवा हाकदिन, अदिक दुसरा अदुर मा रद्दा मंळ्सतान. लेकीन हर ऊंद मंळसा सावधान ईरूल कि आव आऊन मा ह्यांग रद्दा ईटतान. 11 यतिकी आ पायवा अक बिटकु जो बिदकु आद, अदिक अद यीशु मसीह हुन, याऊ दुसरा पायवा हाक सकालुन. 12 अगर यावारा मंळसा ई पायवा मा व्हान्ना, बेळ्ली, बार्र कल्ल, हुळ्ली या काड्डा देल रद्दा मंळस्यान, 13 रा हर ऊंद मंळसा अन्द क्याल्सा प्रगट आगेदीत; यतिकी न्याय इन अद दिन आऊक हेळीत, इदुरसाटी कि बेक्‍की इन सांगुळ प्रगट आदान अदिक अद बेक्‍की हर ऊंद मंळसा अन्द क्याल्सा परखुसीत कि ह्यांग आद. 14 याऊन क्याल्सा आ नीव मा माळकु स्थिर ईत्‍तीत, रा आऊक मजदूरी सिक्‍कीत. 15 अगर यावारा मंळसा अन्द क्याल्सा होतेदित, रा आव घाटा नेगदान; लेकीन आव खुद ऊळदोदान लेकीन व्हत्‍तेला-व्हत्‍तेला.

16 ✡१ कुरिन्थि ६:१९; २ कुरिन्थि ६:१६येन नीव जान्सालीर कि नीव परमेश्वर उन मंदिर हुईर, अदिक परमेश्वर उन आत्मा नीम दा वास माळतद? 17 अगर यावारा मंळसा परमेश्वर उन मंदिर इक नाश माळ्यान रा परमेश्वर आऊक नाश माळ्यान; यतिकी परमेश्वर उन मंदिर पवित्र आद, अदिक अद नीव हुईर.

18 याऊ तान तान इक ध्वाका कोळबाळुल. अगर नीम दा टु यावारा ई दुनिया दा तान तान इक ग्यानी सम्सतान, रा आव मूर्ख बनसुल कि ग्यानी आगेगुल. 19 यतिकी ई दुनिया अन ग्यान परमेश्वर उन हात्‍ती मूर्खता आद, ह्यांग शास्त्र दा लिख्सकु आद, “आव ग्यानीगोळी आंदुर्द चतुराई दा फसुस कोमतान,” 20 शास्त्र दा हिंग लिख्सकु आद कि, “प्रभु ग्यानीगोळ्द विचारगोळी इक जान्सतान कि अव व्यर्थ आव.” 21 इदुरसाटी मंळसागोळ बारा दा यारू घमण्ड माळबाळी, यतिकी सप्पा येनारा नीम दा हुन: 22 येन पौलुस, येन अपुल्लोस, येन कैफा, येन दुनिया, येन जीवन, येन सायोद, येन वर्तमान, येन भविष्य, सप्पा येनारा नीम्दा हुन: 23 नीव मसीह नव हुईर, अदिक मसीह परमेश्वर उन हुन.