1 ✡रोमियों १५:२५,२६ईग आ चन्दा अन्द बारा दा जो परमेश्वर उन पवित्र यहूदा लॉकुर साटी माळकु आगोद, ह्यांग आग्या ना गलातिया अन्द मंडलीगोळ इक कोट्टीन, हांग अच नीव भी माळी. 2 हप्ता अन्द पयला दिन नीम दा टु हर ऊंद तान आमदनी अन्द अनुसार येनारा तान हात्‍ती ईटकु ईरूल कि नान बंदुर मा चन्दा माळोद बिळबाळुल. 3 अदिक याग ना बराईन, रा यारी नीव चाहासीर आंदरी ना चिट्ठी गोळ कोटकु कळु बुळाईन कि नीम्द दान यरूशलेम पहुचुस बुळुल. 4 अगर नांद भी होगोद उचित आत, रा आंदुर नांद सांगुळ होदार.

5 ✡प्रेरितगोळ १९:२१ना मकिदुनिया आगकु नीम्द हात्‍ती बराईन, यतिकी नानी मकिदुनिया आगकु होगोद अच आद. 6 लेकीन संभव आद कि ना नीम्द सांगुळ ठहरूसाईन अदिक सोळी इन मौसम दा भी नीम्द सांगुळ ईल कढाईन, आग या दिशा दी नांद होगोद आगुल आ दिशा दी नीव नानी पहुचुस बुळेतीर. 7 यतिकी ना ईग हादी दा नीम से भेंट माळोद चाहसालीन; लेकीन नानी आशा आद कि अगर प्रभु चाहस्यान रा येनारा समय ताका नीम्द सांगुळ ईराइन.

8 ✡प्रेरितगोळ १९:८-१०लेकीन ना पिन्तेकुस्त इन हाब्ब ताका इफिसुस दा ईराइन, 9 नान साटी अल ऊंद धोळ अदिक उपयोगी दरवाजा तेरकु आद, अदिक विरोधी हापाळ सा आर.

10 ✡१ कुरिन्थि ४:१७अगर तीमुथियुस होट बंदान, रा नोळेतीर कि आऊक नीम्द अल सम्मान सिकुल; यतिकी आव नान घाई प्रभु उन क्याल्सा माळतान. 11 इदुरसाटी याऊ आऊक बेकार सम्सबाळी, लेकीन अदरी खुशी देल ईपाटी पोहचुस बुळी कि नान हात्‍ती होट बरूल; यतिकी ना आऊंद हादी नोळेतीन कि आव वार्टुर सांगुळ बरूल.

12 वार्ट अपुल्लोस से ना हापाळ विनती माळदीन कि नीम्द हात्‍ती वार्टगोळ सांगुळ होगाता; लेकीन आव ई समय होगोद येनु भी इच्छा माळीदिल, लेकीन याग मवका सिक्‍कीत आग होट बंदान.

13 जागस्तेला ईरी, विश्वास दा स्थिर ईरी, हिम्मत ईटी, अदिक बलवन्त आगी. 14 जो येनारा माळतीर प्यार देल माळी.

15 ✡१ कुरिन्थि १:१६हे वार्टुरा, नीव स्तिफनास उन घराना अक जान्सतीर कि आंदुर अखाया अन्द पयला विश्वासी उर, अदिक परमेश्वर उन पवित्र लॉकुर्द स्यावा अन्द साटी तयार ईरतार. 16 इदुरसाटी ना नीम से विनती माळतीन कि हिंग माळावाळेर्द हात्‍ती ईरी, अदिक हर ऊंद मंळसा अन्द जो ई क्याल्सा दा मेहनती अदिक सहकर्मी आन.

17 ना स्तिफनास अदिक फूरतूनातुस अदिक अखईकुस उन बंदुर देल खुश आईन, यतिकी आंदुर नीम्द घट इक पुरा माळदुर. 18 आंदुर नानी अदिक नीम्द आत्मागोळ इक चैन कोट्टुर, इदुरसाटी हिंग माळावाळेर इक मान्सी.

19 ✡प्रेरितगोळ १८:२आसिया इन मंडलीगोळ्द दी टु नीमी नमस्कार; अक्विला अदिक प्रिस्का अन्द अदिक आंदुर्द मान्ना अन्द मंडली अन्द भी नीमी प्रभु दा हापाळ हापाळ नमस्कार! 20 सप्पा विश्वासी वार्टुर्द नीमी नमस्कार.

पवित्र चुम्मा आबुर दाबुर इक कुतक्या अक हचकु आपस दा नमस्कार माळी.

21 ना पौलुस उन तान कय देल लिख्सकु ईरोद नमस्कार.

22 अगर यावारा प्रभु से प्यार ईला ईटुल रा आऊन मा हाय.

हे नाम प्रभु, बर!

23 प्रभु यीशु उन अनुग्रह नीम मा आगतेला ईरूल.

24 नांद प्यार मसीह यीशु दा नीव सप्पा मुंदुर सांगुळ ईरूल. आमीन.