1 लेकीन हे वार्टुरा अदिक आकतींगेरा, समय अदिक कालगोळ बारा दा नीमी येनु लिखसोद जरवत हैलेच. 2 ✡मत्ती २४:४३; लूका १२:३९; २ पतरस ३:१०यतिकी नीव खुद अच जान्सतीर कि ह्यांग ईळ्लक इक काळ्ल बरतान, हांग अच प्रभु उन दिन बरोद आद. 3 याग लॉकुर अनतेला ईत्‍तार, “कुशल आद, अदिक येनु अंज्क हैलेच,” रा आंदुर मा अचानक विनाश बंदीत, याता प्रकार व्हाट्या दी आर्त इक दुख; अदिक आंदुर यातोदु रीति देल ऊळुतीदील. 4 लेकीन हे वार्टुरा अदिक आकतींगेरा, नीव रा अंधकार दा हैलेच कि अद दिन नीम मा काळ्ल उन घाई बंदकु बिळुल. 5 यतिकी नीव सब ज्योति अदिक हागुल इन चिकोर हुईर; नाव ना ईळ्लक इन आयेव, ना अंधकार इन आयेव. 6 इदुरसाटी नाव दुसरा अन घाई मिंगकु ईरतीदील, लेकीन जागस्तेला अदिक सावधान ईत्‍तेव. 7 यतिकी जो मींगतार आंदुर ईळ्लकी इच मींगतार, अदिक जो मतवाला ईरतार आंदुर ईळ्लकी इच मतवाला ईरतार. 8 ✡इफिसिगोळ ६:१३-१७लेकीन नाव जो हागुल इनोर हुयेव, विश्वास अदिक प्यार इन कवच हाक्‍कु अदिक उद्धार इन आशा अन टोप हाक्‍कु सावधान ईत्तेव. 9 यतिकी परमेश्वर नामी सिट्ट इन साटी ईला, लेकीन इदुरसाटी ठहरूस्यान कि नाव तान प्रभु यीशु मसीह अन द्वारा उद्धार प्राप्त माळेव. 10 यीशु नाम साटी ईद कारण सोत्‍तुन कि नाव जित्‍ता ईरूल या सोतकु ईरूल, याग आव बंदान आग सप्पा मीलुस्कु आऊंदा सांगुळ जीऊसेव. 11 ईद कारण आबुर दाबुरी दिलासा कोळी अदिक आबुर दाबुर इन मदत इन कारण बन्सी, ह्यांग कि नीव माळतीर भी.

12 हे वार्टुरा अदिक आकतींगेरा, नाव नीम से विनती माळतेव कि जो नीम दा मेहनत माळतार, अदिक नीम मसीह जीवन दा नीमोर अगुवे आर, अदिक नीमी शिक्षा कोळतार, आंदुर्द सम्मान माळी. 13 अदिक आंदुर क्याल्सा अन कारण प्यार इन सांगुळ आंदरी हापाळ अच आदर इन योग्य समसी. आपस दा मेल मिलाप देल ईरी. 14 हे वार्टुरा अदिक आकतींगेरा, नाव नीमी समझुसतेव कि जो ठीक चाल नळालुर आंदरी समझुसी, कायरगोळी हिम्मत कोळी, निर्बलगोळी सभांळसी, सप्पा दी सहनशीलता तोर्सी. 15 सावधान. याऊ यारदु से बुराई इन बदला बुराई माळबाळुल; लेकीन हमेशा वळ्लीद माळदुर मा तत्पर ईरी, आपस दा अदिक सप्पा मुंदुर से भी भलाई माळी. 16 हमेशा खुश ईरी. 17 हमेशा प्रार्थना दा हतकु ईरी. 18 हर मात दा धन्यवाद माळी; यतिकी नीम मसीह यीशु दा परमेश्वर उन ईदा इच्छा आद. 19 आत्मा अक नुनाक बाळी. 20 परमेश्वर उन दी टु बरावाळा बातणी इन धिक्कार माळबाळी. 21 सप्पा मातगोळी परखुसी; जो वळ्लेव आव अवरी हुळकु ईटी. 22 सप्पा प्रकार इन बुराई देल उळ्दकु ईरी.

23 शांती नव परमेश्वर खुद अच नीमी पुरा रीति देल पवित्र माळुल; अदिक नीम्द आत्मा अदिक जीव अदिक शरीर नाम प्रभु यीशु मसीह अन बरोद ताका पुरा-पुरा अदिक निर्दोष सुरक्षित ईरूल. 24 नीमव कारावाळा विश्वासलायक आन, अदिक आव हिंग अच माळ्यान.

25 हे वार्टुरा अदिक आकतींगेरा, नाम साटी प्रार्थना माळी.

26 सप्पा विश्वासी वार्टुरी परमेश्वर उन पवित्र प्यार दा नमस्कार.

27 ना नीमी प्रभु उन अधिकार देल नीमी विनती माळतीन कि ईद चिट्ठी सप्पा विश्वासी वार्टुरी वाचुसकु केळ्सकु आगुल.

28 नाम प्रभु यीशु मसीह अन्द अनुग्रह नीम मा आगतेला ईरूल.