1 ईग ना सब से पयले ईद आग्रह माळतीन कि विनती, प्रार्थना, निवेदन, अदिक धन्यवाद सप्पा मंळसागोळ साटी माळकु आगुल. 2 राजागोळ अदिक सप्पा धोळ अधिकारीगोळ्द निमित्त इदुरसाटी कि नाव शांती अदिक चैन इन सांगुळ परमेश्वर उक आदर कोळतेला अदिक पवित्रता देल जीवन बीतुसेव 3 ईद नाम उद्धारकर्ता परमेश्वर उक वळ्लीसा हततद अदिक प्रसन्न भी माळतद, 4 जो ईद चाहासतान कि सप्पा मंळसागोळ ऊळ्सकु आगुल, अदिक आंदुर सच्चाई इन ग्यान इक जान्स कोमुल. 5 यतिकी परमेश्वर ऊंद अच आन, अदिक परमेश्वर अदिक मंळसागोळ न्याड्या दा भी ऊंद अच मध्यस्थ भी आन, मतलब मसीह यीशु जो मंळसा हुन. 6 यीशु नाम सप्पा मुंदरी छुटकारा कोळोर साटी तान बलिदान कोटकु आजादी कोंडुन, अदिक आऊन गवाही सही समय मा कोटकु आत. 7 ✡२ तीमुथियुस १:११ना सही अनतीन, ख्वाटा माताळालीन, कि ना ईदा उद्देश देल प्रचारक अदिक प्रेरित अदिक गैरयहूदीगोळ साटी खरा विश्वास इन उपदेशक ठहरूस्कु आदीन.

8 इदुरसाटी मंडली दा आराधना हाळाहोती ना चाहसतीन कि हर जागा मंळसा, बिना सिट्ट अदिक विवाद इन पवित्र कयगोळी नेगुकु प्रार्थना माळतोगुल. 9 ✡१ पतरस ३:३हांग अच आर्तेर भी नम्रता अदिक खुद: नियंत्रण इन सांगुळ साधासुधा कपळागोळ देल तान तान इक सवारसुल; ना कि चुट्टी सवारसकु अदिक ना व्हान्ना अदिक मोती अदिक किमती कपळा देल, 10 लेकीन भला क्याल्सा देल, यतिकी परमेश्वर उन भक्ति माळावळतेर आर्तेरी भी ईदा वळ्लीद आद. 11 आर्त इक शांतता देल अदिक पुरा हात्‍ती ता देल कलु पायजे. 12 ना आर्तेरी ईजाजत कोळालीन कि आर्त ना शिक्षा कोळुल अदिक ना मंळसा मा अधिकार जतुसुल, लेकीन सुंगा मुंगा ईरूल. 13 यतिकी आदम पयले, आऊन बाद्दा हवा माळकु आदुर; 14 अदिक आदम ईला जो बहकुसकु आगीदुन, लेकीन आ आर्त हुळ जो बहकुसकु आगिदुर अदिक पापी ठहरूसदुर. 15 *चिकोरी पैदा माळकु उद्धार ताकोंडार: या चिकोरी हाळाहोती सुरक्षित ईटकु आदार. तरी भी आर्त इक चिकोर पैदा माळोर द्वारा उद्धार सिक्‍कीत, अगर आक संयम सांगुळ विश्वास, प्यार, अदिक पवित्रता दा संची ईरूल.