1 ✡कुलुस्सिगोळ २:१३आव नीमी भी जित्‍ता माळदुन, जो तान अपराधगोळ अदिक पापगोळ्द कारण सोतकु ईरोर 2 यदुर मा नीव पयला ई दुनिया अन रीति मा, अदिक आकाश इन अधिकार इन शासक मतलब आ आत्मा अन्द अनुसार नळीर, जो ईग भी आग्या ईला मान्सावाळेर्द कार्य माळतान. 3 इंदुर दा नाव भी सप्पा अच मुंदुर पयला तान मय इन लालसागोळ दा दिन बितुसेव, अदिक मय अदिक मन इन इच्छागोळी पुरा माळेव, अदिक अन्य लॉकुर घाई स्वभाव देल सिट्ट इन औलाद ईरेव.

4 लेकीन परमेश्वर जो दया अन्द धनी आन, तान आ धोळ प्यार इन कारण यार देल आव नाम से प्यार माळदुन, 5 याग नाव अपराधगोळ्द कारण सोतकु ईरेव रा नामी मसीह अन्द सांगुळ जित्‍ता माळदुन अनुग्रह देल अच नीम्द उद्धार आत, 6 अदिक मसीह यीशु दा आऊन सांगुळ नेगदुन, अदिक स्वर्गीय जागा दा आऊन सांगुळ कुर्सदुन 7 कि आव तान आ कृपा देल जो मसीह यीशु दा नाम मा आद, बरावाळा समय इन दुनिया दा तान अनुग्रह अन्द असीम धन तोर्सदुन. 8 यतिकी विश्वास इन भेंट इन द्वारा अनुग्रह देल अच नीम्द उद्धार आत, अदिक ईद नीम्द दी टु ईला, बल्‍की परमेश्वर उन दान हुन, 9 अदिक ना कर्मगोळ्द कारण, हिंग आगबाळुल कि यावारा घमण्ड माळुल. 10 यतिकी आव नामी माळ्यान, अदिक मसीह यीशु दा आ वळ्लीद क्याल्सागोळ्द साटी माळकु आगीर यारी परमेश्वर पयला टु नामी माळोर साटी तयार माळदुन.

11 ई कारण याद माळी कि नीव जो शारीरिक रीति देल गैरयहूदी आईर अदिक जो लॉकुर मय दा कय इन माळकु खतना देल खतनावाळेर कहलुस्तार, आंदुर नीम इक खतनारहित अनतार, 12 नीव लॉकुर आ समय मसीह टु अलग, अदिक इस्त्राएल इन प्रजा अन्द पद देल अलग माळकु आदीर, अदिक वादा अन्द वाचागोळ्द भागी ईला ईरोर, अदिक आशाहीन अदिक दुनिया दा मय रहित ईरोर. 13 लेकीन ईग मसीह यीशु दा नीव जो पयला दुर ईरीर, मसीह अन्द रक्ता अन द्वारा हात्‍ती आगेगीर. 14 यतिकी आवा नाम्द मेल हुन जो येढ्ढु मुंदरी ऊंद माळ कोंडुन अदिक अलग माळावाळा दिवार इक जो बीच दा ईरोद केडु बुट्टुन, 15 ✡कुलुस्सिगोळ २:१४अदिक तान मय दा दुश्मनी मतलब अद व्यवस्था यदुर्द आग्यागोळ विधीगोळ्द रीति मा ईरव, मिटकुस बुट्टुन कि येढ्ढु देल तान दा ऊंद व्हाशोद मंळसा पैदा माळकु मेल माळसुस बुळुल, 16 ✡कुलुस्सिगोळ १:२०अदिक क्रूस मा दुश्मनी इक नाश माळकु इदुर द्वारा येढ्ढु मुंदरी ऊंद मय माळकु परमेश्वर देल भेंट माळसुस्यान. 17 आव बंदकु नीमी जो दुर ईरीर अदिक आंदरी जो हात्‍ती ईरोर, येढ्ढु मुंदरी मेल मिलाप इन खुशखबरी केळ्सदुन. 18 यतिकी आऊन द्वारा नाव येढ्ढु मुंदुर्द ऊंद आत्मा दा आप्प उन हात्‍ती प्रवेश आगतद.

19 इदुरसाटी नीव ईग परदेशी अदिक मुसाफिर ईतीदील, लेकीन पवित्र लॉकुर्द संगी स्वदेशी अदिक परमेश्वर उन घराना दोर आगेदीर. 20 अदिक प्रेरितगोळ अदिक भविष्यवक्तागोळ्द पायवा मा, यार्द क्वाना अन्द कल्ल मसीह यीशु खुद अच आन, माळकु आगीर. 21 यदुर्दा पुरा रचना ऊंद सांगुळ मिलुसकु प्रभु दा ऊंद पवित्र मंदिर बन्सतेला होगतद, 22 यदुर्दा नीव भी आत्मा अन्द द्वारा परमेश्वर उन निवास स्थान आगोर साटी ऊंद सांगुळ माळकु आगतीर.