1 आग यहोवा नूह से अंदुन, “नी तान पुरा घराना अन सांगुळ जहाज मा होटोग; यतिकी ना ई समय इन लॉकुर दा टु नीनी का तान नजर इन मुंद धर्मी नोळीन. 2 सप्‍पा जाती इन शुद्ध जनावर दा टु रा नी येळ येळ जोळी मतलब नर अदिक मादा ताकोमेत; लेकीन जो जनावर शुद्‍ध हैलेच, अऊर दा टु येढ्‍ढ येढ्‍ढ ताकोमेत, मतलब नर अदिक मादा;✡7:2 लैव्यव्यवस्था 11 3 अदिक आकाश इन पक्षी दा टु भी येळ येळ जोळी, मतलब नर अदिक मादा ताकोमेत, कि अऊर वंश उळकु पुरा पृथ्‍वी इन म्‍याकुच बन्सकु ईरूल. 4 यतिकी येळ दिन अदिक बितुसदुर मा ना पृथ्‍वी मा चालीस दिन अदिक चालीस ईळ्‍ल्‍क ताका नीर बरसुसतेला ईराईन; अदिक यास प्राणीगोळी ना माळीन आ सप्‍पा अक पृथ्‍वी मा टु नाश माळ बुळाईन,” 5 यहोवा अन ई आग्‍या अन अनुसार नूह माळदुन.

6 नूह इन ऊमर आर सौ वर्ष इन ईरोद, याग जल-प्रलय पृथ्‍वी मा बत्‍त. 7 नूह तान पारगोळ, हिंग्‍स, अदिक तान सास्सागोळ सांगुळ जल-प्रलय से ऊळोर साटी जहाज मा होदुर.✡7:7 मत्ती 24:38-39; लूका 17:27 8 शुद्ध अदिक अशुध्‍द, येढ्‍ढु प्रकार इन जनावर दा टु, पक्षीगोळ, 9 अदिक जमीन मा रांगसावाळा कीळागोळ दा टु भी, येढ्‍ढ येढ्‍ढ, मतलब नर अदिक मादा, जहाज दा नूह इन हाती होदोव, याता प्रकार परमेश्वर नूह अक आग्‍या कोटीदुन. 10 येळ दिन इन बाद्‍दा प्रलय इन नीर पृथ्‍वी मा बरली कुर्त.

11 याग नूह अन ऊमर इन आर सौ वर्ष इन दुसरा तिंगुळ इन सतरावा दिन बत्‍त; अदा दिशी धोळ्‍द गहरा समुद्र अन सप्‍पा सोतागोळ वळ्‍द कुरतव अदिक आकाश इन झरोखागोळ खुलसेदव.✡7:11 २ पतरस 3:6 12 अदिक माळ चालीस दिन अदिक चालीस ईळ्‍ल्‍क पृथ्‍वी मा आगतेला ईत्‍त. 13 ठीक अदा दिशी नूह तान पार शेम, हाम, अदिक येपेत, अदिक तान हिंग्‍स, अदिक मुरू सास्सागोळ सांगुळ, 14 अदिक आंदुर सांगुळ ऊंद ऊंद जाती इन सप्‍पा आळी दाकळव जनावर, अदिक घरेलु जनावर, अदिक ऊंद ऊंद जाती इन सप्‍पा पृथ्‍वी मा रांगसावाळा किळा, अदिक हर ऊंद जाती इन ऊळुसावाळा पक्षी, जहाज मा होदव. 15 यास प्राणीगोळ दा जीवन इन प्राण ईरोद अऊर सप्‍पा जातीगोळ दा टु येढ्‍ढ येढ्‍ढ नूह उन हाती जहाज दा होदोव. 16 अदिक जो होदोव, अव परमेश्वर उन आग्‍या अन अनुसार सप्‍पा जाती अन प्राणीगोळ दा टु नर अदिक मादा होदोव. आग यहोवा जहाज इन दरवाजा बंद माळ बुट्‍टुन.

17 पृथ्‍वी मा चालीस दिन ताका जल-प्रलय आगतेला ईत्‍त; अदिक हापाळ अच वाळुसतेला होत, यदुर देल जहाज म्‍याकुच येळली कुर्त; अदिक अद पृथ्‍वी मा टु म्‍याकुच येदोत. 18 नीर वाळुस्‍त वाळुस्‍त पृथ्‍वी मा हापाळ अच वाळुसेत, अदिक जहाज नीर इन म्‍याकुच म्‍याकुच तैरूस्‍तेला ईत्‍त. 19 नीर पृथ्‍वी मा हापाळ अच वाळुसेत, ईल ताका कि पुरा धरती मा यास भी धोड्‍डेव धोड्‍डेव पहाळीगोळ ईरोव, सप्‍पा मुळकेदव. 20 नीर पन्‍द्राह कय अदिक म्‍याकुच वाळुसेत, अदिक पहाळी भी मुळ्कदव. 21 अदिक येन पक्षी, येन घरेलु जनावर, येन आळी दाकळव जनावर, अदिक पृथ्‍वी मा सप्‍पा नळावाळा प्राणी, अदिक यास किळा पृथ्‍वी दा हापाळ तुम्‍मेगीदव, अव सप्‍पा अदिक सप्‍पा मंळसा सोतोदुर. 22 जो जो जागा मा ईरोर, अऊर दा टु यास मुंदुर्द मुग्गगोळ दा जीवन इन श्‍वास ईरोद, सप्‍पा सोतोदुर. 23 अदिक येन मंळसा, येन जनावर, येन रांगसावाळा जन्तु, येन आकाश इन पक्षी, जो जो भूमी मा ईरव सप्‍पा पृथ्‍वी मा टु नाश माळदेव; सिर्फ नूह, अदिक यास आऊन सांगुळ जहाज दा ईरोर, आंदुर अच ऊळदुर. 24 अदिक नीर पृथ्‍वी मा ऊंद सौ पचास दिन ताका थामस्‍कु ईत्‍त.