1 हे नान वार्टुरा अदिक आकतींगेरा, नाम महिमायुक्त प्रभु यीशु मसीह मा नीम विश्वास पक्षपात इन सांगुळ आगबाळुल. 2 समसी अगर ऊंद धनवान मंळसा व्हान्ना अन्द छल्ला अदिक सुंदर फळक्या हाक्‍कु नीम सभा दा बरूल, अदिक ऊंद गरीब मंळसा भी रेंदुसदव फळक्या हाक्‍कु बरूल, 3 अदिक नीव आ सुंदर फळक्यावाळा अन्द चेहरा नोळकु अंदीर, “नी अल वळ्लीद जागा दा कुर,” अदिक आ गरीब मंळसा से अंदीर, “नी ईल निदुरकु ईर,” या “नान कालगोळ हात्‍ती कुर.” 4 रा येन नीव आपस दा भेद-भाव माळीदिल अदिक बेकार उद्देश देल न्याय माळावाळेर ठहरूसीदील? 5 हे नान प्रिय वार्टुरा अदिक आकतींगेरा, केळी. येन परमेश्वर ई दुनिया अन्द गरीबगोळ्द चुनाव माळीदिल कि विश्वास दा धनी अदिक आ राज्य अन्द अधिकारी आगुल, यदुर्द वादा आव आंदुर से माळ्यान जो आऊन से प्यार ईटतार? 6 लेकीन नीव गरीब उन अपमान माळदीर. अदिक आंदुर यार उर जो नीम मा अत्याचार माळतार अदिक नीमी कचेरीगोळ दा जेडु जेडुकु ओयतार?

7 येन आंदुर ईंदुर आल्लच जो मसीह अन वळ्लीद हेसुर इंद अपमान माळतार? जो नीमी कोटकु आग्याद. 8 तरी भी अगर नीव पवित्रशास्त्र अन्द ई वचन इन अनुसार कि “नी तान मान्ना हातळोर वाळेर से तान घाई प्यार ईट” खराखुरा आ राज व्यवस्था अक पुरा माळतीर, रा वळ्लीद अच माळतीर. 9 लेकीन अगर नीव लॉकुर्द बाहरी पहराव नोळकु व्यवहार माळतीर, रा नीव पापी आईर, अदिक व्यवस्था नीमी नियम मुरावाळा ठहरूसतद. 10 यतिकी जो यावारा सप्पा व्यवस्था अन्द पालन माळतान लेकीन ऊंद अच मात दा चुकसेगुल रा आव सप्पा मातगोळ दा दोषी ठहरूसकु आग्यान. 11 याव ईद अंदुन, “नी व्यभिचार माळबाळेत,” आवा ईद भी अंदिदुन, “नी हत्या माळबाळेत,” इदुरसाटी अगर नी व्यभिचार रा माळीदिल लेकीन हत्या माळ्द तरी भी नी व्यवस्था अन्द उल्लंघन माळावाळा ठहरूस्द. 12 नीव आ लॉकुर घाई वचन माताळी अदिक क्याल्सा भी माळी, यार्द न्याय आ व्यवस्था अन्द अनुसार आदीत जो नामी स्वतंत्र माळतद. 13 इदुरसाटी जो दयालु हैलेच आऊन साटी परमेश्वर उन न्याय भी बिना दया अन्द अच आदीत लेकीन दया न्याय मा विजयी आद.

14 हे नान वार्टुरा अदिक आकतींगेरा, अगर यावारा अनुल कि नानी विश्वास आद लेकीन आव कर्म माळालुन, रा इदुर से येन फायदा? येन ईत्‍ता विश्वास यागल्यारा आऊन उद्धार माळ सकतद? 15 अगर यावारा वार्टुरा या आकतींग इन हाती जंग कपळा ईरूल अदिक आंदरी हर रोज भोजन इंद कमी ईरूल, 16 अदिक नीम दा टु यावारा आंदुर से अनुल, “शांती देल होगी, नीमी पर्याप्त कपळा सिकुल अदिक नीव वळ्लीद खाना तीनकु संतुष्ट ईरी,”

लेकीन जो वस्तुगोळ मय इन साटी जरूरी आव अव आंदरी ईला कोळुल रा येन फायदा? 17 हांग अच, अगर विश्वास भी कर्म सहित हैलेच रा तान स्वभाव दा सोतकु आद.

18 अगर यावारा अनतान, “नीनी विश्वास आद अदिक कर्म ना माळतीन.” नी तान विश्वास नानी कर्म इन बिना रा तोर्स; अदिक ना तान विश्वास तान कर्मगोळ्द द्वारा तोरसाईन. 19 येन नीनी विश्वास आद कि ऊंद अच परमेश्वर आन? नी वळ्लीद माळत्या. दुष्टआत्मा भी विश्वास ईटताव, अदिक नळ्गताव. 20 लेकीन हे निकम्मा मंळसा, येन नी ईद भी अरू सकाल कि कर्म इन बिना विश्वास व्यर्थ आद? 21 याग नाम पुर्वज अब्राहम तान पार इसहाक उक वेदी मा यर्सदुन, रा येन आव कर्मगोळ देल न्यायी ईला ठहरूसीदुन? 22 इदुरसाटी नी नोळ कोंड कि विश्वास आऊन क्याल्सागोळ सांगुळ मिलुसकु प्रभाव हाक्याद, अदिक कर्मगोळ देल विश्वास सिद्ध आत, 23 *उत्पत्ति १५:६ अदिक पवित्रशास्त्र अन्द ईद वचन पुरा आत: “अब्राहम परमेश्वर उन विश्वास माळदुन, अदिक ईद आऊन साटी न्यायी आळुकु आदुन,” अदिक आऊक परमेश्वर उन संगी अंदकु आत. 24 ई प्रकार नीव नोळ कोंडीर कि मंळसा सिर्फ विश्वास देल अच ईला, उलटा कर्मगोळ देल भी न्यायी ठहरूसकु आगतान. 25 हांगा राहाब वेश्या भी, याग आक स्वर्गदूतगोळी तान मान्या ईळ्सदुर अदिक दुसरा हादी देल विदा माळदुर, रा येन आक कर्मगोळ देल न्यायी ठहरूसदुर? 26 हांगा ह्यांग मय आत्मा अन्द बिना सोतकु आद, हांग अच विश्वास भी कर्म इन बिना सोतकु आद.