1 इदुर बाद्दा ना पृथ्वी इन नाकु क्वाना मा नाक स्वर्गदूत नीदुरकु नोळदीन. आंदुर पृथ्वी इन नाकु हवा अक रोक्सकु ईरोर ताकी पृथ्वी या समुद्र या यातोदु मार्र मा हवा नळु बाळुल. 2 बाक ना मात्‍त ऊंद स्वर्गदूत उक जित्‍ता परमेश्वर उन मोहर हुडुकु पूर्व टु म्याकुच बर्त नोळदीन; आव आ नाकु स्वर्गदूतगोळ देल यवरी पृथ्वी अदिक समुद्र अन्द नुकसान माळोद अधिकार कोटकु आगीत, धोळ शब्द देल कारूकु अंदुन, 3 “यागासताका नाव तान परमेश्वर उन दासगोळ ह्याणा मा मोहर हच कोमालेव, आगासताका पृथ्वी अदिक समुद्र अदिक मार्रगोळी नुकसान पोहचुस बाळेतीर.” 4 यार मा मोहर कोटकु आत ना आंदुर गिनती केळदीन, मतलब इस्त्राएल इन औलादगोळ्द सप्पा गोत्र दा टु ऊंद लाख चौवालीस हजार मा मोहर कोटकु आत: 5 यहूदा अन्द गोत्र दा टु हन्नेळ हजार मा मोहर कोटकु आत; रूबेने अन्द गोत्र दा टु हन्नेळ हजार मा, गाद इन गोत्र दा टु हन्नेळ हजार मा. 6 आशेर इन गोत्र दा टु हन्नेळ हजार मा, नप्ताली इन गोत्र दा टु हन्नेळ हजार मा, मनश्शिह अन्द गोत्र दा टु हन्नेळ हजार मा, 7 शमौन उन गोत्र दा टु हन्नेळ हजार मा, लेवी इन गोत्र दा टु हन्नेळ हजार मा, इस्साकार इन गोत्र दा टु हन्नेळ हजार मा, 8 जबूलून उन गोत्र दा टु हन्नेळ हजार मा, यूसुफ उन गोत्र दा टु हन्नेळ हजार मा, अदिक बिन्यामीन उन गोत्र दा टु हन्नेळ हजार मा मोहर कोटकु आत.

9 इदुर बाद्दा ना नजर तिर्गुसदिन, अदिक नोळी, हर ऊंद जाती अदिक कुल अदिक लॉकुर अदिक भाषा दा टु ऊंद हिंग धोळ्द भीळ, यदरी याऊ आळु ईला सकोन, बिळी फळक्या हाक्‍कु अदिक तान कयगोळ दा खजुर इन डगालगोळ हुडुकु सिंहासन इन मुंद अदिक म्यांडा अन्द पाड्डा अन्द मुंद निदुरकु आद, 10 अदिक धोळ्द शब्द देल कारूकु अनतद, “उद्धार इन साटी नाम परमेश्वर उन, जो सिंहासन मा कुर्तकु आन, अदिक म्यांडा अन्द पाड्डा अन्द जय-जयकार आगुल!” 11 अदिक सप्पा स्वर्गदूत आ सिंहासन अदिक स्याणागोळ अदिक नाकु प्राणीगोळ नाकु दी निदुरकु आर; बाक आंदुर सिंहासन इन मुंद बाय इन भार देल बिदोदुर अदिक परमेश्वर उक दण्डवत माळकु अंदुर, 12 “आमीन! नाम परमेश्वर उन स्तुति अदिक महिमा अदिक ग्यान अदिक धन्यवाद अदिक आदर अदिक सामर्थ्य अदिक ताकत हमेशा हमेशा बन्सकु ईरूल. आमीन!”

13 इदुर मा स्याणागोळ दा टु ऊंद नान से अंदुन, “ई बिळी फळक्यागोळ हाक्‍कु यार उर? अदिक यल टु बंदार?”

14 ✡मत्ती २४:२१; मरकुस १३:१९ना आंदुर से अंदीन, “हे स्वामी, नी अच जान्सत्या.”

आव नान से अंदुन, “ईंदुर आंदुर उर, जो आ महाक्लेश दा टु होटकु बंदार; इंदुर तान-तान फळक्या म्यांडा अन्द पाड्डा अन्द रक्ता दा तोळकु बिळेव माळ्यार. 15 ईदा कारण आंदुर परमेश्वर उन सिंहासन इन मुंद आर, अदिक आऊन मंदिर दा ईळ्लक-हागुल आऊन स्यावा माळतार, अदिक जो सिंहासन मा कुर्तकु आन, आव आंदुर म्याकुच तान तम्बू तानस्यान. 16 आंदुर बाक उपासा अदिक नीरअळ्क देल ईरतीदील; अदिक ना आंदुर मा यागल्यारा बिसुल बिद्दीत. 17 यतिकी म्यांडा अन्द पाड्डा जो सिंहासन इन न्याड्या दा आद आंदुर जागनी माळीत, अदिक आंदरी जीवन रूपी नीर इन डोबन इन हात्‍ती ओतीत; अदिक परमेश्वर आंदुर कण्णगोळी बाक यागलु वर्लगोळतिदिल.