1 बाक ना मंदिर दा यारीकारा ऊँचा शब्द देल आ येळु स्वर्गदूतगोळ देल ईद अनतेला केळदिन, “होगी, परमेश्वर उन प्रकोप इन येळु कटोरागोळ इक पृथ्वी मा पलटुस बुळी.”

2 इदुरसाटी पयले स्वर्गदूत होगकु तान कटोरा पृथ्वी मा पलटुस बुट्टुन. आग आ मंळसागोळ्द, यार मा पशु उन छाप ईरव अदिक जो अदुर्द मूर्ति इन पुजा माळोर, ऊंद प्रकार इन बुरा अदिक दुखदाई फ्वाळा होळ्त.

3 दुसरा स्वर्गदूत तान कटोरा समुद्र मा उलटुस बुट्टुन, अदिक आव सोतकु मंळसा अन्द रक्ता घाई बन्सेदुन, अदिक समुद्र दाकळव हर ऊंद जीवधारी सोतोदव.

4 तीसरा स्वर्गदूत तान कटोरा गांगागोळ अदिक नीर इन झरनागोळ मा पलटुस बुट्टुन, अदिक आंदुर रक्ता बन्सदुर. 5 आग ना नीर इन स्वर्गदूत उक ईद अनतेला केळदीन, “हे पवित्र, जो आद अदिक जो ईरोद, नी न्यायी आय अदिक नी ईद न्याय माळ्द. 6 यतिकी आंदुर पवित्र लॉकुर अदिक भविष्यवक्तागोळ्द रक्ता वाहुसीदुर, अदिक नी आंदरी रक्ता कुळ्सद; यतिकी आंदुर ईदा योग्य आर.” 7 बाक ना वेदी टु ईद शब्द केळदीन, “हव, हे सर्वशक्तिमान प्रभु परमेश्वर, नीन निर्णय वळ्लीद अदिक खरा आद.”

8 चौथा स्वर्गदूत तान कटोरा सुर्य मा उलटुस बुट्टुन, अदिक आऊक मंळसागोळ इक बेक्‍की देल झुलसुसोद अधिकार कोटकु आत. 9 मंळसा हापाळ बिसुल देल झुलसुसदुर, अदिक परमेश्वर उन हेसुर इन यारी ई परेशानीगोळ मा अधिकार आद, अपमान माळदुन लेकीन आऊन महिमा माळोर साटी मन तिर्गुसिदील. आऊन महानता अन्द प्रशंसा माळतार.

10 पाचवा स्वर्गदूत तान कटोरा आ पशु उन सिंहासन मा पलटुस बुट्टुन, अदिक आऊन राज्य मा अंधार छासेत. लॉकुर दुख इन मारा तान तान ल्यालग्या कचली हतदुर, 11 अदिक तान पीळागोळ अदिक फ्वाळागोळ्द कारण स्वर्ग इन परमेश्वर उन अपमान माळदुर; लेकीन तान तान क्याल्सागोळ देल मन तिर्गुसिदील.

12 सहावा स्वर्गदूत तान कटोरा महागांगा फुरात मा पलटुस बुट्टुन, अदिक अदुर्द नीर वंळगेत कि पूर्व दिशा अन्द राजागोळ्द साटी हादी तयार आगेगुल. 13 बाक ना आ अजगर इन बाय देल, अदिक आ पशु उन बाय देल अदिक आ ख्वाटा भविष्यवक्ता अन्द बाय देल मुर अशुध्द आत्मागोळ इक भ्याबकागोळ्द रूप दा होळतेला नोळदिन. 14 ईव चिन्ह तोर्सावाळेर दुष्टआत्मागोळ हुव, जो पुरा दुनिया अन राजागोळ्द हात्‍ती होटकु इदुरसाटी होगताव कि आंदरी सर्वशक्तिमान परमेश्वर उन आ धोळ दिन इन लळाई इन साटी जमा माळुल.

15 ✡मत्ती २४:४३,४४; लूका १२:३९,४०; प्रकाशितवाक्य ३:३“नोळ, ना काळ्ल उन घाई बरतीन; धन्य आव आन जो जागस्तेला ईरतान, अदिक तान कपळागोळ्द सावधानी माळतान कि ऊगळा वयाळबाळुल, अदिक लॉकुर आऊन ऊगळापन नोळबाळुल.”

16 अदिक आंदुर आंदरी आ जागा दा जमा माळदुर जो इब्रानी दा हर-मगिदोन कहलुसतद.

17 सातवा स्वर्गदूत तान कटोरा हवा मा उलटुसदुन, अदिक मंदिर इन सिंहासन टु ईद धोळ शब्द आत, “आगेग्याद!” 18 ✡प्रकाशितवाक्य ८:५; ११:१३,१९बाक बिजलीगोळ चमकुसदव, अदिक शब्द अदिक गर्जन आत, अदिक ऊंद हिंग धोळ भूकम्प बत्‍त कि यागी टु मंळसा अन्द उत्पत्ति पृथ्वी मा आत, आगी टु हिंग धोळ भूकम्प यागलु बंदिदील. 19 इदुर देल आ धोळ नगर इन मुर तुकळा आगेदव, अदिक गैर यहूदीगोळव नगर बिद्दव; अदिक धोळ बेबीलोन इन याद परमेश्वर उन अल आत कि आव तान सिट्ट इन जलजलाहट इन सारा आऊक कुळसुल. 20 ✡प्रकाशितवाक्य ६:१४अदिक हर ऊंद टापू तान जागा टु टलुसेत, अदिक पहाळगोळ्द पता हतीदील. 21 ✡प्रकाशितवाक्य ११:१९आकाश टु मंळसागोळ मा मन-मन तुमकु धोळ गारगोटी बिद्दव, अदिक इदुरसाटी कि ईद विपत्‍ती हापाळ अच भारी ईरोद, लॉकुर गारगोटी इन विपत्‍ती इन कारण परमेश्वर उन अपमान माळदुर.