1 ✡२ पतरस ३:१३बाक ना व्हाशोद आकाश अदिक व्हाशोद पृथ्वी इक नोळदीन, यतिकी पयला आकाश अदिक पयला पृथ्वी होगतेला ईरोद, अदिक समुद्र भी ईतीदील. 2 ✡प्रकाशितवाक्य ३:१२बाक ना पवित्र नगर व्हाशोद यरूशलेम इक स्वर्ग टु परमेश्वर उन हात्‍ती टु ईळुतेला नोळदीन. अद आ मंळगीत इन घाई ईरोद जो तान गांड्ड उन साटी सिंगार माळकु आर. 3 बाक ना सिंहासन दा टु यावारा अक धोळ शब्द देल ईद अनतेला केळदीन, “नोळ, परमेश्वर उन ड्यारा मंळसागोळ्द न्याड्या दा आद. आव आंदुर सांगुळ ड्यारा माळ्यान, अदिक आंदुर आऊन लॉकुर आदार, अदिक परमेश्वर खुद आंदुर सांगुळ ईत्‍तान अदिक आंदुर परमेश्वर आदान. 4 आव आंदुर कण्णगोळ देल सप्पा नीर सिट्ट कोंडान; अदिक इदुर बाद्दा मृत्यु ईला ईत्‍तीत, अदिक न शोक, न विलाप, न पीळा ईत्‍तीत; पयला मातगोळ होगतेला ईत्‍तव.”

5 जो सिंहासन मा कुर्तकु ईरोन, आव अंदुन, “नोळ, ना सब येनारा व्हाशोद माळकु कोळतीन.” बाक आव अंदुन, “लिख्स कोम, यतिकी ईव वचन विश्वास इन योग्य अदिक सत्य आव.” 6 बाक आव नान से अंदुन, “ईव मातगोळ पुरा आगेग्याव. ना अल्फा अदिक ओमेगा, पयला अदिक आखरी हुईन. ना प्यासा अक जीवन इन नीर इन झरना दा टु फुकट दा कुडोद अधिकार कोळाईन. 7 जो विजय आदान आवा ई वस्तुगोळ्द वारीस आदान, अदिक ना आऊन परमेश्वर आगाईन अदिक आव नान पार आदान. 8 लेकीन डरपोकगोळा, अदिक अविश्वासीगोळा, अदिक नीच हरकत माळावाळेरा, अदिक हत्या माळावाळेरा अदिक व्यभिचारीगोळा, अदिक जादू टोना माळावाळेरा, अदिक मूर्ति इन पुजा माळावाळेरा, अदिक सब ख्वाटा मातगोळ्द भाग आ झील दा सिक्‍कीत जो बेक्‍की अदिक गन्धक देल होततेला ईरतद: ईद दुसरा मृत्यु हुन.”

9 बाक आ येळ स्वर्गदूतगोळ हात्‍ती येळ आखरी परेशानी देल तुमकु येळ कटोरागोळ ईरव, आंदुर दा टु ऊंद नान हात्‍ती बंदुन, अदिक नान सांगुळ मातगोळ माळकु अंदुन, “ईल बर, ना नीनी मंळगीत मतलब म्यांडा अन्द पाड्डा अन्द हिंग्स तोर्साईन.” 10 आग आव नानी आत्मा दा ऊंद धोळ अदिक ऊँचा पहाळ मा ओतुन, अदिक पवित्र नगर यरूशलेम इक स्वर्ग टु परमेश्वर उन हात्‍ती टु ईळुतेला तोर्सदुन. 11 परमेश्वर उन महिमा आंदुर्दा ईरोद, अदिक आऊन ज्योति हापाळ अच किमती कल्ल, मतलब बिल्लौर इन घाई यशब उन घाई स्वच्छ ईरोद. 12 आऊन दिवार शयरपनाह धोळ ऊँचा ईरोद, अदिक आऊन हन्नेळ फाटक अदिक फाटकगोळ मा हन्नेळ स्वर्गदूत ईरोर; अदिक आ फाटकगोळ मा इस्त्राएलीगोळ्द हन्नेळ गोत्रगोळ्द हेसुर लिख्सकु ईरव. 13 पूर्व दिशा अन दी मुर फाटक, उत्‍तर दिशा अन दी मुर फाटक, दक्षिण दिशा अन दी मुर फाटक, अदिक पश्चिम दिशा अन दी मुर फाटक ईरव. 14 नगर इन दिवार इन शयरपनाह अन्द हन्नेळ नींवगोळ ईरव, अदिक अदुर मा म्यांडा अन्द पाड्डा अन्द हन्नेळ प्रेरितगोळ्द हन्नेळ हेसुर लिख्सकु ईरव. 15 जो नान सांगुळ मातगोळ माळोन आऊन हात्‍ती नगर अदिक आऊन फाटकगोळ अदिक आऊन शयरपनाह अक आळोर साटी ऊंद व्हान्ना अन्द गज ईरोद. 16 अद नगर वर्गाकार बसुस्कु ईरोद अदिक अदुर्द लंबाई, चौळाई इन बराबर ईरोद; अदिक आव आ गज देल नगर इक आळदुन, रा साढ़े येळ सौ कोस इन होळ्त: अदुर्द लंबाई अदिक चौळाई अदिक ऊँचाई बराबर ईरोद. 17 आव आऊन शयरपनाह अक मंळसा अन्द मतलब स्वर्गदूत उन नाप देल आळदुन, रा ऊंद सौ चौवालीस कय होळ्त. 18 आऊन शयरपनाह यशब इन बन्सकु ईरोद, अदिक नगर हिंग शुद्ध व्हान्ना अन्द ईरोद जो स्वच्छ काँच इन घाई ईरूल. 19 आ नगर इन नींवगोळ हर प्रकार इन किमती कल्लगोळ देल सवारस्कु ईरोद; पयला पायवा यशब देल, दुसरा नीलमणी देल, तीसरा लालळी देल, चौथा मरकत देल, 20 पाचवा गोमेदक देल, सहावा माणिक्य देल, सातवा पीतमणी देल, आठवा पेरोज देल, नववा पुखराज देल, दसवा लहसनिए देल, ग्यारवा धूम्रकान्त देल, अदिक बारवा चन्द्रकाँत मणी देल बन्सकु ईरोद. 21 हन्नेळु फाटक हन्नेळ मोतीगोळ्द ईरव; ऊंद ऊंद फाटक ऊंद ऊंद मोती इन माळकु ईरोद. नगर इन सळक स्वच्छ काँच इन घाई शुद्ध व्हान्ना अन्द ईरोद.

22 ना अदुर्दा यातोदु मंदिर नोळीदील, यतिकी सर्वशक्तिमान प्रभु परमेश्वर अदिक म्यांडा अन्द पाड्डा अदुर्द मंदिर आद. 23 आ नगर दा सुर्य अदिक चंद्रमा अन्द ऊजुळ इन जरवत हैलेच, यतिकी परमेश्वर उन तेज देल अदुर्दा ऊजुळ आगेत्याद, अदिक म्यांडा अन्द पाड्डा आऊन दिंग्या हुन. 24 जाती-जाती इन लॉकुर आऊन ज्योति दा नळुकु वयाळ्यार, अदिक पृथ्वी इन राजा तान तान तेज इन सामाईन अदुर दा तंदार. 25 आऊन फाटक हागुल इक यागलु बंद आगतीदील, अदिक ईळ्लक अल आगतीदील. 26 लॉकुर जाती जाती इन तेज अदिक वैभव इन सामाईन अदुर दा तंदार. 27 लेकीन अदुर्दा यातोदु अपवित्र वस्तु या बेकार क्याल्सा माळावाळा, या ख्वाटा मात्‍तगोळ गढुसावाळा यातोदु रीति देल प्रवेश माळ सकालुन, पर सिर्फ आ लॉकुर यार हेसुर म्यांडा अन्द पाड्डा अन्द जीवन इन किताब दा लिख्सकु आव.