1 ✡मत्ती ७:१; लूका ६:३७इदुरसाटी हे दोष हचावाळा, नी यावारा येती आगबाळुल, नी निरुत्तर आय; यतिकी याता मात दा नी दुसरा मा दोष हचत्या अदा मात दा तान तान इक भी दोषी ठहरूसत्या, इदुरसाटी कि नी जो दोष हचत्या खुद अच अद क्याल्सा माळत्या. 2 यतिकी नाव जान्सतेव कि जो लॉकुर हिंग क्याल्सा माळतार, परमेश्वर आदुर्द सच्चाई देल न्याय माळतान. 3 लेकीन हे मंळसा, नी जो हिंग-हिंग क्याल्सा माळावाळेर मा दोष हचत्या अदिक खुद अच अव क्याल्सा माळत्या; येन ईद सम्सत्या कि नी परमेश्वर उन न्याय देल ऊळदोद्या? 4 येन नी आऊन महान दया, अदिक शहनशीलता, अदिक धीरज इक तुच्छ जान्सत्या? येन नी सही दा ईद समसाल कि परमेश्वर उन दया नीनी मन फिराव दी ओयतद? 5 लेकीन नी तान कठोरता अदिक जीद्दी मन इन कारण आ दिन इन साटी, जो दिन परमेश्वर उन सिट्ट अदिक खरा न्याय प्रगट आदीत, नी तान साटी दण्ड तयार माळेत्या. 6 परमेश्वर नाम सप्पा मुंदुरी तान कर्मगोळ्द हिसाब देल प्रतिफल कोट्टान: 7 जो लॉकुर वळ्लीद क्याल्सा दा हतकु ईरतार परमेश्वर उन दी टु सीकतद महिमा, आदर, अदिक अमरता अन खोज दा आर, आंदरी परमेश्वर अनन्त जीवन कोट्टान; 8 लेकीन जो लॉकुर मतलबी आर अदिक जो सच्चाई इक स्वीकार माळतार. ताकी बुरा क्याल्सा माळ सकुल ईत्‍ता लॉकुर मा परमेश्वर तान सिट्ट अदिक प्रकोप पलटुस्यान. 9 दुख अदिक परेशानी हर ऊंद मंळसा मा जो बुराई माळतान बंदीत, पयले यहूदी मा बाक गैरयहूदीगोळ मा; 10 लेकीन परमेश्वर जो वळ्लेव क्याल्सा माळतार आंदरी महिमा, आदर अदिक शांती प्रदान माळ्यान, पयले यहूदीगोळ इक बाक गैरयहूदीगोळ इक. 11 यतिकी परमेश्वर बिना पक्षपात देल सप्पा मुंदुर्द न्याय माळतान.

12 गैरयहूदीगोळ हात्‍ती मूसा अन्द व्यवस्था हैलेच अदिक आंदुर्द न्याय भी बिना व्यवस्था देल आदीत, यहूदीगोळ हात्‍ती मूसा अन्द व्यवस्था आद अदिक आंदुरव माळदव पापगोळ न्याय व्यवस्था अन अनुसार अच आदीत. 13 यतिकी परमेश्वर उन मान्या व्यवस्था अक केळावाळेर न्यायी हैलेच, लेकीन व्यवस्था मा नळावाळेर न्यायी ठहरूस्कु आदार. 14 गैरयहूदी लॉकुर यार हात्‍ती व्यवस्था हैलेच, लेकीन आंदुर तान तान दा व्यवस्था मा नळुतार, इदुरसाटी आंदुर तान तान दा अच व्यवस्था आर, जब की आंदुर हात्‍ती मूसा अन्द व्यवस्था हैलेच. 15 आ लॉकुर्द चाल चलन तोर्सतद कि व्यवस्था आंदुर्द दिलगोळ दा लिख्सकु आग्याद. अदिक आंदुरव मन भी अनताव कि ईदा सत्य हुन, अदिक ईदरी हुडुकु आंदुरव विचार आंदरी यागलु निर्दोष या यागलु अपराधी ठहरूसताव; 16 आ दिशी परमेश्वर नान प्रचार माळ्द खुशखबरी इन अनुसार परमेश्वर यीशु मसीह अन द्वारा मंळसागोळ गुप्त विचारगोळ्द न्याय माळ्यान.

17 अगर नी तान तान इक यहूदी अनत्या, अदिक नीनी तान परमेश्वर मा अभिमान आद, 18 अदिक नीनी मालूम आद कि परमेश्वर नीन से येन माळसुसोद चाहासतान अदिक सही मातगोळ इक निवळुसोद नी व्यवस्था देल कलत्या; 19 अदिक तान तान मा भरोसा ईटतान कि ना कुढ्ढगोळव अगुवा, अदिक अंधकार दा बिदकु आर आंदुर ज्योति, 20 मुर्खगोळ इक निर्देश कोळावाळा, अदिक भोला मंळसा गोळोव शिक्षक आन. अदिक नी सही आय कि जो नियम शास्त्र नीन हात्‍ती आद, अदुर्दा पुरा सत्यता अदिक पुरा ग्यान इन समावेश आद. 21 इदुरसाटी येन नी जो दुसरागोळी कल्सत्या, तान तान मा येती लागु माळाल? येन नी जो काळ्लपन ईला माळोद शिक्षा कोळत्या, खुद अच काळ्लपन येती माळत्या? 22 नी जो अनत्या, “व्यभिचार ईला माळ पायजे,” रा खुद अच व्यभिचार येती माळत्या? नी जो मूर्तीगोळ से घृणा माळत्या, येन खुद अच मंदिरगोळी येती लुट्सत्या? 23 नी जो व्यवस्था अन बारा दा घमण्ड माळत्या, रा खुद परमेश्वर उन व्यवस्था ईला मान्सकु परमेश्वर उन अनादर माळत्या? 24 “यतिकी नीम कारण गैरयहूदीगोळ दा परमेश्वर उन हेसुर इन अपमान माळकु आगतद,” ह्यांग शास्त्र दा लिख्सकु आद.

25 अगर नी व्यवस्था अन्द पालन माळ्या रा खतना देल लाभ रा आद, लेकीन अगर नीव व्यवस्था अन उल्लंघन माळत्या रा नींद खतना बिना खतना अन्द दशा ठहरूस्त. 26 इदुरसाटी अगर गैरयहूदी यार्द खतना आगीदील तरी भी व्यवस्था अन्द पालन माळतान रा येन आऊन खतनारहित आगदुर मा भी खतना माळकु आत आळुकु आगतीदील? 27 अदिक खुद यहूदीगोळी गैरयहूदीगोळ द्वारा दोषी ठहरूस्कु आदीत जब की नीम हात्‍ती लिख्सद व्यवस्था अदिक खतना माळकु आगीर लेकीन गैरयहूदी व्यवस्था अन पालन माळतार जब की आंदुर्द शारीरिक रूप देल खतना आगीदील. 28 ऊंद खरा यहूदी यार्द सही दा खतना आग्याद, आव याव हुन? खरा यहूदी आव आलच जो सिर्फ बाहरी रूप देल यहूदी आन, यार्द खतना सिर्फ शारीरिक आद. 29 लेकीन खरा यहूदी आवा हुन जो बुळ्क टु यहूदी आन; यार्द दिल देल खतना आग्याद अदिक ईद परमेश्वर उन आत्मा अन्द क्याल्सा हुन, ना कि लिख्सद व्यवस्था अन्द. ईत्‍ता मंळसा परमेश्वर उन दी टु प्रशंसा पाऊस्यान ना कि मंळसा अन दी टु.