1 Ìh phai loq ta 'nhòng ma atìq lùch èh i bàc bìac nan xa, 2 ma jah 'màng aih con mangai hèm toq ca dađeh, hèm toq ca 'bac jèn, loq catèh wa rataoq, loq capoch 'mèq ca mangai 'noiq, ùh iu bàu miq baq, ùh i ca manoh loq manè, ùh hadròih, 3 ùh i ca manoh loq waq, xa ca hatroq, capoch jù lê, ùh pagàt dađeh, ngang dù, git ca mangai rìh lem. 4 Tablòq manoh, loq nòih, padèch dađeh, hèm ca trong pagôq yi hnao loq waq ca Boc Plình, 5 enh gùng wì broq tìah loq waq ca Chuaq, mahaq enh trom chôiq cađac cwìang itai ma jah broq wì hadròih. 'Bài mangai 'màng aih ìh phai wìa hangai!

6 Ta wì haq i 'nah ngai achop mùt ta hnem, padô alùan 'bài gu cadrì ma 'nhòq craq manoh, bình halùih tôiq lôi, wa i manoh ham enh, 7 cadrì cô jò leq xôq hŏc yôt mahaq ùh jò leq 'nì loq ca bàu joq 'nàng. 8 Calah nèh Jannet wa Jambê tajraq hlài ca Môise 'màng leq, èh 'bài mangai gù calô cô hadai tajraq hlài ca bàu joq 'nàng dàng aih. Manoh cliac wì haq blàq blènh, ùh enh lùi bàu joq 'nàng. 9 Mahaq wì haq ùh jah broq lìq 'màng aih hloi hloi, ma jah 'màng aih bìac blùng wì haq, dìq ca mangai jah hnoq ro, hadai tìah ca bìac blùng da Jannet wa Jambê calah nèh.

10 Phàn da ìh, ìh khoi hŏc tiaq au, trong bìac hnài, bìac rìh lem, manoh enh, manoh lùi, manoh chìuq àt, can loq waq wa manoh cajap dràng, 11 bìac ti rùp wa bìac nan xa ma au khoi chìuq ŏi ta phôq An-ti-ôt, I-cô-ni wa Litra, mahaq Chuaq khoi dèch au claih dìq dŏng. 12 Joq 'nàng dìq dŏng rìm ngai enh rìh tiaq trong hadròih Chuaq Jêxu Crich, èh phai chìuq bìac padit padiang. 13 Mahaq 'bài mangai ngang dù, mangai loq 'nùt, èh rai hamoq yi hnao hòm, padô alùan wì, wa 'bìq wì padô alùan chao. 14 Mahaq phàn da ìh, ìh phai yòng cajap hloi ta bìac ìh khoi hŏc wa khoi lùi joq 'nàng, taiq ìh loq ìh khoi hŏc bìac aih ti cabô, 15 enh jò ìh ŏi 'yoh, ìh khoi jah loq Sech Hadròih jah broq ìh khôn rabiaq đòiq jah dèch claih nhò manoh lùi ta Chuaq Jêxu Crich. 16 Dìq ca bàu ta Sech Hadròih jah Boc Plình xreo ajèn, i lòiq ca bìac hnài bàu joq 'nàng, tagàih lech, anoq hlài bìac ùh troq da mangai, wa hnài mangai trong ta-atoq, 17 nhò enh aih, mangai da Boc Plình jah padon tôm gêh, ta'mroq đòiq broq rìm bìac lem.