5
Ti Chaq Au Đòiq Jah Rìh
1 Ô hnem Is-ra-ên, tamàng bàu cô beq! Cô bàu calêu ha-on au ta-oih ca pì:
2 “Gù adrùh xriu da Is-ra-ên khoi tacro,
pi jah yòng hlài hòm;
haq khoi 'bìq ca'nìh đac ta taneh
mahaq ùh i ca cabô dèch haq yòng.”
3 Ma jah 'màng aih Chuaq Boc Plình doi:
“Phôq leq 'noh mòiq ngŏng lình lam tajêh,
ŏi xrong hlài mòiq hrinh ngai raq;
phôq leq 'noh mòiq hrinh lình lam tajêh,
ŏi xrong hlài 10 ngai raq.”
4 Cô bàu Chuaq doi ca hnem Is-ra-ên:
“Chaq Au beq, èh pì jah rìh!
5 Paq chaq Bêtên,
paq mùt ta Gingan, paq lam trùh ta Bê-e-sê-ba;
taiq Gingan cô èh 'bìq 'nong đac,
Bêtên jah wìa nòi tacro hech hoch.”
6 Chaq Chuaq beq, èh pì jah rìh;
tàng ùh 'màng aih,
Haq tìah ca pla ùnh cheo mùt ta hnem Jôsep,
bùh đac Bêtên ùh i cabô jah broq pat.
7 Pì halìh bìac lem jang loh pagiang xang,
hwenh ca'nìh đac bìac ta-atoq ta taneh!
8 Haq khoi broq loh 'bài halŏng Gàn Dac wa 'bài halŏng ca Ratŏng;
broq clam loh daxroq,
broq dahì wìa clam loh damang,
creo ca diac raxìq trùh,
hi khoi ùc 'noh ta crŏng taneh;
hiniq Haq aih Chuaq.
9 Ta mòiq ca'nhip mat Haq jêh dìq ca lù lình dêh tanuq,
raliang đac 'bài phôq hagao.
10 Pì git ca mangai hadrah ta-atoq,
wa ramòt ca mangai capoch 'noh bàu joq 'nàng.
11 Taiq pì broq xa ca mangai pa
wa thê wì am 'mau thèq,
'màng aih 'bài hnem pì broq xam hmu pah,
mahaq pì ùh jah ŏi.
Pì khoi pìt wùan nho nhim,
mahaq ùh jah ôq diac nho haq.
12 Au loq bìac ngang dù pì bàc dàng leq,
tôiq lôi pì càn caiq 'màng leq,
pì padit padiang mangai ta-atoq, nhàn caq dahwèq rŏt manoh
wa gùt đac trong troq da 'bài mangai pa ŏi ti 'mang ngo phôq.
13 Taiq 'màng aih, ta 'nhòng aih, mangai rabiaq ŏi hatenh;
aih 'nhòng da mangai ngang dù.
14 Chaq bìac lem beq, paq chaq bìac dù,
đòiq pì jah rìh,
Chuaq ma wèq dìq ca 'bình plình jah ŏi ti ìh
tìah ca pì ma ngèh enh.
15 Git ca bìac dù wa loq enh ca bìac lem beq;
broq bìac ta-atoq ti nòi 'mang phôq beq.
'Màng aih Chuaq ma wèq dìq ca 'bình plình jah xa-ŏch ca 'bài mangai
ma ŏi xrong hlài da Jôsep!
16 Taiq 'màng aih, Chuaq Boc Plình ma wèq dìq ca 'bình plình doi:
“Rìm nòi ta phôq, wì crò hmoi;
rìm trong ta phôq wì cachech bàu dêh!
Wì creo ca 'bài mangai ma abroq lam trùh đòiq hràng rayoih,
wa 'bài mangai hmoi yŏc 'bac lam trùh đòiq ca bàu ha-on.
17 Ta rìm wùan nho hadai i bàu hmoi rayoih,
ma jah 'màng aih Au lam cwa đòiq baxa pì.”
Chuaq doi 'màng aih.
18 Nan xa ca pì mangai ngèh gòm
hì da Chuaq!
Pì ngèh gòm broq cleq ca hì da Chuaq?
Ca pì, aih hì clam clôiq ùh xài hì i 'ngah.
19 Tìah ca mòiq ngai cadàu mot ca baco,
glàm higàu;
jò mùt ta hnem bèq tì ti panàt,
glàm bìh cap.
20 Hì da Chuaq loh ca clam clôiq 'mòh, ùh 'ngah 'mòh,
clam clôiq hapinh hapàt, ùh i ca 'ngah xreo leq?
21 “Au git, Au khìn 'bài hì lè da pì;
Au ùh lem manoh ca 'bài hì lè càn da pì.
22 'Nhac ca pì dèch am 'bài ngè tadreo bùh wa dèch am ngè xam 'mau mì ca Au,
Au ùh nhàn yŏc;
Au ùh blèch ngan 'bài ngè bech dèch am tadreo
waiq catèm da pì.
23 Don đac bàu ca ta-ùang ta-àt da pì khoi ca Au beq!
Au ùh enh tamàng atêh đòng da pì.
24 Mahaq broq ca bìac ta-atoq jah plôh tŏc tìah ca diac beq,
wa bìac lem jang jah hìu dêh 'màng ca diac cròng.
25 “Ô mangai Is-ra-ên, pì khoi lah dèch am ca Au ngè tadreo,
wa ngè xam 'mau mì trom 40 hanam ta đùng wang wê 'mòh?
26 Mahaq pì xôq ŏi tòng Moloc dua 'mù da bùa pì,
wa Kiyun can kiac halŏng da pì
ma pì khoi broq loh dèh ca cla pì.
27 Taiq 'màng aih, Au broq ca pì 'bìq 'nong lam broq hapŏng pah tau ca Đamat.”
Chuaq doi 'màng aih, hiniq Haq Boc Plình ma wèq dìq ca 'bình plình.