9
Can Rìh da Con Mangai Ŏi ta Tì Boc Plình
1 Au dìq dèh ca manoh hèm haboq bìac mangai ta-atoq, mangai khôn rabiaq wa bìac broq da wì haq: Au hnoq dìq ŏi ta cadop tì Boc Plình. Bèn ùh jah loq Haq xa-ŏch ca mangai leq loq git ca mangai leq. Rìm bìac dìq tiaq manoh enh da Haq. 2 Rìm bìac dìq hatìah ca dabau ca rìm ngai:
Mangai ta-atoq loq mangai ngang dù,
mangai lem loq mangai amùa,
mangai dèch am ngè tadreo loq mangai ùh dèch am ngè tadreo,
mangai broq bìac lem loq mangai broq bìac dù,
mangai pachac bàu loq mangai yùq bàu pachac,
dìq i mòiq 'nhòng rìh hatìah ca dabau.
3 Bìac cô joq ùh lem, taiq con mangai dìq i mòiq 'nhòng rìh hatìah ca dabau, 'màng aih ùh mangai leq hèm ca broq bìac lem, lùch ca 'nhòng broq bìac dù, wì hèm trùh jò mangai leq xôq cachìt. 4 Ùh mangai leq claih ca bìac cachìt; jò ŏi rìh ŏi i bìac ngèh enh, joq 'nàng con coq rìh yi hnao ca baco hlari cachìt!
5 Ma jah 'màng aih mangai rìh loq ca dađeh cô èh cachìt,
mahaq mangai cachìt ùh 'nì cleq,
wì haq pi jah cùng baha cleq hòm,
con mangai khoi hèt đac ca wì haq,
pi i cabô hmàng hòm.
6 Bìac loq xa-ŏch, manoh git 'bŏn,
bìac tarahen da wì haq hadai khoi hnhung dŏng,
wì haq pi wiang pajùm cleq bìac
ma broq enh 'neq ca mat mahì hòm.
Bàu Pariaq
7 'Màng aih phai caq lem bùi wa ôq manè pôi beq, taiq Boc Plình lem manoh ca ìh broq 'màng aih. 8 Jò leq xôq caxùnh atàc eo taboc beq, apaq hèt ca xùt dàu thùm ta gàu. 9 Rìh lem bùi dèh ti mai ma ìh loq waq rìm hì lùch dèh ca 'nhòng Boc Plình khoi am ca ìh jò ŏi rìh enh 'neq ca mat mahì. Taiq cô phàn da ìh jò ŏi rìh wa broq xalep enh 'neq ca mat mahì. 10 Bìac cleq con broq jah, khòh broq dìq dèh ca padren, ma jah 'màng aih ta nòi cachìt, aih nòi ìh phai trùh, pi i ca bìac broq, pi i ca bìac hèm hatình, pi i ca bìac loq 'nì, loq bìac khôn rabiaq.
11 Enh 'neq ca mat mahì au ngan hnoq bìac cô hòm:
Ùh xài jò leq mangai cadàu dêh xôq jah adroi.
Ùh xài mangai lình dêh padren ta tajêh poh jò leq xôq jah 'blêq.
Ùh xài mangai khôn rabiaq jò leq xôq jah panàc.
Ùh xài mangai loq 'nì jò leq xôq jah padrŏng can.
Ùh xài mangai ragài jò leq xôq jah wì doi lem.
Ma jah 'màng aih bìac troq wa jò broq jah loh ca rìm ngai.
12 Ùh i ca mangai leq jah loq jò leq bìac ranàc trùh ca dađeh,
tìah ca ca hlech hlàm,
tìah ca chìm hlech rayeo,
con mangai hadai clêh
jò bìac ranàc ta'ngàc trùh traiq.
Hèm Trùh ca Bìac Khôn Rabiaq wa Bìac Blùng
13 Au hadai hnoq bìac khôn rabiaq enh 'neq ca mat mahì, bìac aih joq lem ca manoh hèm au. 14 I mòiq phôq 'yoh toq 'biaq mangai ŏi, i mòiq ngai bùa broq dêh càn 'nong lình lam dudan ca phôq aih, èh broq lì đòiq hi blah yŏc phôq. 15 Mahaq ta phôq aih i mòiq ngai khôn rabiaq mahaq pa, yŏc dèh can khôn rabiaq đòiq dèch dèh phôq. Mahaq ùh i mangai leq hmàng hiniq mangai pa aih. 16 'Màng aih, au hèm ta manoh: “Khôn rabiaq yi hnao ca padren dêh.” Mahaq can khôn rabiaq da mangai pa 'bìq wì khìn, bàu haq capoch ùh i mangai tamàng.
17 Bàu anoi chop da mangai khôn rabiaq, lem yi hnao ca bàu brêu da mangai wèq cwìang ta'ne mangai blùng.
18 Bìac khôn rabiaq lem yi hnao ca ranac tajêh,
mahaq mòiq ngai broq tôiq broq raliang bàc bìac lem.