1 Jò aih au tàng i bàu capoch dêh ta don au, doi: “Ô 'bài mangai ma nhàn bàu đòiq hadrah phôq cô, lam haten ca Au, rìm ngai dìq wê ranac đòiq jêh đac oq.” 2 I tadràu ngai enh 'mang ngo ma 'nhèq, aih ngo pah 'ngeo ca mat mahì loh, rìm ngai dìq wê ranac jêh mangai. Ta'ne wì i mòiq ngai caxùnh eo xam bai habùac, jang ca'nam haq teo wê long achìh wa mùc. Wì haq lam trùh yòng pah kenh ca ca'bŏng cùh waiq xam đùng.

3 Èh bìac 'ngah 'ngai Boc Plình da jàn Is-ra-ên loh khoi enh Chê-ru-bim, trùh jang 'mang hnem cùh waiq, doi ca mangai ma caxùnh eo xam bai habùac, wê long achìh wa mùc jang ca'nam. 4 Chuaq doi ca mangai aih: “Lam jàp ta phôq beq, lam jàp ca Jê-ru-sa-lem, pateo đòiq jang ngòng 'bài mangai leq ma crò hmoi, wa ramòt ca rìm bìac tôiq lôi ma khoi broq ta phôq cô.”

5 Don au tàng Haq doi ca 'bài mangai 'noiq: “Lam tiaq mangai 'mat oq, lam jàp ca phôq jêh ma dìq, ùh jah xa-ŏch ca mangai leq, 6 Jêh ma dìq mangai craq, mangai radam, mangai adrùh, con 'yoh, mangai cadrì, mahaq paq jêh mangai leq i teo jang ngòng, baxèm enh nòi hadròih da Au beq.” 'Màng aih 'bài mangai aih adroi dŏng jêh đac dìq ca 'bài craq phôq ma 'nang ŏi enh ngìa ca hnem cùh waiq.

7 Haq doi ca 'bài mangai aih: “Broq ca nòi cùh waiq loh amùa beq, ta xàn bình halùih ca hanang mangai cachìt.”, 'Màng aih wì lam jêh dìq ca mangai ta phôq. 8 Jò 'bài mangai aih khoi lam đòiq jêh đac, ŏi i mòiq ngai au, au bla-op dađeh ti ha'neq crò hmoi, au doi: “Chuaq ôi! Ìh ùc 'noh can nòih Ìh ta Jê-ru-sa-lem wa jêh dŏng dìq ca mangai ma ŏi xrong hlài ta Jê-ru-sa-lem 'mòh?” 9 Èh Haq doi ca au: “Tôiq lôi da jàn Is-ra-ên wa jàn Juđa khoi dìq jaq càn, taneh bình halùih ca mahem, ta phôq khoi pi i ca bìac ta-atoq, ma jah 'màng aih wì haq doi: ‘Chuaq khoi cađac Taneh Diac cô; Chuaq ùh hnoq cleq.’ 10 Mahaq phàn Au, mat Au ùh xa-ŏch wa ùh dèch dŏih, Au jah ùc ta gàu wì haq rìm bìac ma dìq jaq 'mèq 'mac tôiq lôi cla wì haq khoi broq.”

11 Khoi ca aih mangai ma caxùnh eo bai habùac, i wê long achìh wa mùc ta ca'nam, wìh hlài doi: “Au khoi broq gêh rìm bìac Ìh ma thê au broq”.