18
Boc Plình Broq Ta-Atoq Tàng Ngai Tàng Ngai
Èh hòm i bàu Chuaq doi ca au 'màng cô: “I bàu cachôi cô ca Taneh Diac Is-ra-ên doi:
“ ‘Baq caq plì nho jòq,
mahaq con kìa hanenh? Bàu aih enh doi cleq?’
“Chuaq Boc Plình doi: Joq 'nàng troi Au ma rìh hloi, pì ùh jah anoi hlài bàu cachôi aih ta Is-ra-ên hòm. Cô, rìm mahua yiang dìq ŏi ta Au; mahua yiang da baq wa mahua yiang da con hadai; mahua yiang leq broq tôiq, èh mahua yiang aih cachìt.
“Mahaq tàng mangai leq ta-atoq,
broq tiaq bìac lem jang wa rìh ta-atoq,
ùh caq ngè dua 'mù tadreo ta wang,
ùh 'ngoc ngan 'bài dua 'mù da hnem Is-ra-ên,
ùh tango ca mai da mangai ma haten hatìa,
ùh thia haten ca gu cadrì 'nang ŏi ùh wìa;
haq ùh padit padiang ca cabô,
am hlài dahwèq yòng pagàu thai da mangai ma pòq dòih,
ùh yŏc atùng ngè leq da cabô,
am 'benh ca mangai pangot,
caxùnh am eo ca mangai ŏi rahòng,
am mùan ùh caq lòi bàc,
ùh yŏc tam, dùi dèh tì khoi ca bìac ngang dù,
yŏc bàu joq 'nàng hadrah ta-atoq ca mangai cô
wa mangai 'noiq;
rìh tiaq ranenh Au wa wèq tiaq bàu thê Au,
caq ŏi lem,
aih mangai rìh ta-atoq;
joq 'nàng mangai aih jah rìh,
Chuaq Boc Plình doi 'màng aih.
10 “Tàng haq i con calô hùng hang broq ta-ùc mahem, loq broq bìac leq ta bìac 'mèq khoi anoi enh 'nhèq aih, 11 mahaq con aih broq bàc bìac 'mèq 'mac ma baq haq ùh lah broq,
“haq cùh waiq dua 'mù ta wang,
tango anang ca mai da mangai ma haten hatìa,
12 padit padiang mangai pa thìuq,
yŏc atùng cùng hang wì,
ùh am hlài dahwèq yòng pagàu,
wa 'ngoc ngan 'bài dua 'mù
wa broq bìac ramòt,
13 am mùan yŏc lòi wa yŏc tam,
con aih jah rìh ùh? Ùh, haq ùh rìh! Taiq haq khoi broq rìm bìac 'mèq 'mac aih, joq 'nàng haq ùh claih ca cachìt, mahem da mangai aih jah ta ùc hlài ta cla haq.
14 “Mahaq tàng mangai aih xa-ông con calô, con haq khoi hnoq rìm bìac tôiq baq haq khoi broq, mahaq haq ùh broq bìac leq tìah troi 'màng aih;
15 “Con aih ùh caq ngè tadreo ta wang,
ùh 'ngoc ngan dua 'mù da hnem Is-ra-ên,
wa ùh tango ca mai da mangai haten hatìa ca haq,
16 ùh padit padiang cabô,
ùh yŏc hloi dahwèq yòng pagàu,
ùh yŏc atùng cùng hang cabô,
mahaq am 'benh ca mangai pangot,
caxùnh am eo ca mangai ŏi rahòng;
17 haq dùi dèh tì khoi ca bìac padit padiang mangai pa,
ùh yŏc ngè caq lòi wa ùh yŏc tam,
wèq tiaq bàu thê Au wa broq tiaq ranenh Au,
èh con aih ùh cachìt taiq bìac ngang dù da baq haq, haq jah rìh. 18 Phàn da baq haq, taiq haq khoi broq bìac caq lòi 'mèq 'mac, wa broq tôiq yŏc atùng dèh cùng hang oh daq, broq bìac ùh lem dèh ta jàn; cô, haq raq jah cachìt dèh ta bìac ngang dù cla haq.
19 “Mahaq pì ŏi doi: ‘Broq 'màng leq con haq ùh hìaq ep pòq bìac dù baq haq?’ Taiq con haq khoi broq tiaq bìac lem jang wa bìac ta-atoq, wa khoi wèq dìq dŏng ranenh wa broq tiaq, joq 'nàng haq jah rìh. 20 Mahua yiang leq broq tôiq èh cachìt. Con ùh jah pòq bìac ngang dù da baq, wa baq ùh jah pòq bìac ngang dù da con. Bìac ta-atoq da mangai rìh ta-atoq jah doi dèh ca cla haq ta-atoq, bìac dù da mangai dù jah ta'mòq ta cla haq.
21 “Mahaq tàng mangai dù cađac dìq dèh ca tôiq haq khoi broq, wèq rìm ranenh Au, broq tiaq trong lem jang wa bìac ta-atoq, joq 'nàng haq jah rìh wa ùh cachìt. 22 Ùh i mòiq tôiq leq haq khoi broq jah hmàng hlài wa tajraq hlài ca haq; haq jah rìh taiq nen bìac ta-atoq haq khoi broq. 23 Chuaq Boc Plình doi: Au ùh lem bùi ca bìac cachìt da mangai dù, mahaq bùi ca bìac haq cađac dèh trong dù cla đòiq rìh.
24 “Mahaq jò mangai rìh ta-atoq cađac dèh bìac rìh ta-atoq èh broq tôiq, broq bìac 'mèq troi mangai dù ma broq, haq jah rìh ùh? Ùh, ùh i mòiq bìac ta-atoq leq haq khoi broq jah hmàng hlài; taiq haq broq bìac ùh troq wa broq tôiq lôi, taiq 'màng aih haq jah cachìt ta aih.
25 “Mahaq pì doi hòm: ‘Trong da Chuaq ùh ta-atoq!’ 'Màng aih, Ô hnem Is-ra-ên, tamàng cô: Trong da Au ùh ta-atoq 'mòh? Ma ùh xài trong da pì raq ùh ta-atoq 'mòh? 26 Jò mangai ta-atoq cađac dèh bìac rìh ta-atoq wa broq tôiq, haq cachìt; aih taiq haq khoi broq tôiq haq jah cachìt. 27 Tàng mangai dù cađac dèh bìac dù haq khoi broq, èh broq tiaq bìac lem jang wa broq bìac ta-atoq, joq 'nàng haq jah dèch dèh mahua yiang jah rìh. 28 Taiq haq khoi hèm hlài wa cađac rìm bìac tôiq lôi haq khoi broq, joq 'nàng haq jah rìh, haq ùh hìaq cachìt. 29 Mahaq hnem Is-ra-ên doi: ‘Trong da Chuaq ùh ta-atoq.’ Ô hnem Is-ra-ên trong da Au ùh ta-atoq loq trong da pì raq ùh ta-atoq.
30 “ 'Màng aih Ô hnem Is-ra-ên Au hadrah ìh, Au jah hadrah pì tiaq dèh bìac broq da tang ngai. Canao loq dèh ca tôiq lôi beq, paq blàq blènh hòm, paq broq tôiq hòm đòiq tôiq ùh wìa bìac catŏih cro da pì. 31 Cađac dìq bìac tôiq lôi pì khoi broq, đòiq broq hlài manoh neo wa yiang ma neo, taiq hagleq ìh loq enh cachìt, Ô hnem Is-ra-ên? 32 Taiq Au ùh bùi manoh ca mòiq ngai leq phai cachìt.” Chuaq Boc Plình doi. “ 'Màng aih, cađac dèh manoh broq tôiq beq đòiq jah rìh.”