24
Bàu Alìah Raliang Đac Phôq Jê-ru-sa-lem
1 Hì 10, khê 10, hanam hachìn, i bàu Chuaq doi ca au: 2 “Ô con mangai, achìh hiniq hì cô beq, hì cô raq, bùa Ba-bi-lôn lam trùh dudan đòiq tajêh ca phôq Jê-ru-sa-lem. 3 Capoch mòiq nà bàu alìah ca hnem tablàq da Juđa aih: ‘Chuaq Boc Plình doi 'màng cô:
“ ‘Adrang gŏc beq,
ùc diac ta gŏc.
4 Tah 'bài ha'nech jam xech beq,
aih dìq 'bài ha'nech jam xech jìang,
cataih wa plêh,
wa tah ta gŏc bình ca caxènh jìang. m
5 Ràih yŏc trìu leq ma yi lem ta 'bài trìu,
tah ta gŏc bùh long ùnh enh 'neq ca gŏc.
Đòiq diac tro hlòm.
Hadai àp caxènh ti gŏc.
6 “ ‘ 'Màng aih, Chuaq doi 'màng cô:
“ ‘Nan xa ca phôq ta-ùc mahem yôt,
nan xa ca gŏc khoi axiang,
xùt ùh hreo!
Dŏih yŏc jam tang ha'nech beq,
ùh ep ràih cleq.
7 “ ‘Taiq mahem haq khoi broq ta-ùc ŏi ta haq;
haq khoi ùc mahem aih ti crŏng hmu raho;
haq ùh ùc ta taneh
đòiq blo taneh jah gahnàp đac.
8 Aih broq ca can nòih plôh tŏc wa tabroq chao,
Au ùc mahem haq ta hmu raho;
trùh 'mòi haq ùh jah bàng cadoc.
9 “ ‘ 'Màng aih, Chuaq Boc Plình doi 'màng cô:
“ ‘Nan xa ca phôq broq ta-ùc mahem!
Au hadai broq mòiq 'ngùc long ùnh càn.
10 'Ngùc long ùnh beq, bùh ùnh dêh,
pai jam ta diac tro,
tah tam dahwèq xua thùm,
phai cheo caxènh.
11 Khoi èh adrang gŏc dech ta ngia ùnh gòh beq,
dôq gŏc đùng aih cheo,
broq ca bìac amùa haq ŏi pah trom jah hech,
wa dôq ca axiang haq jah hreo dŏng.
12 Haq broq lep 'ngwan;
mahaq 'bài axiang bàc da haq 'nhòq hreo;
'nhac ca tah axiang haq ta ùnh, xôq ùh hreo.
13 “ ‘Ta bìac padrùh da gè aih tango anang, ma jah 'màng aih Au enh broq hreo ca gè, mahaq gè xôq ùh enh waq, èh gè ùh jah hreo dèh bìac amùa, trùh hloi jò Au ngach ca nòih.
14 “ ‘Au Chuaq khoi doi bìac aih jah trùh, Au jah broq loh bìac aih; Au ùh talùi, ùh xa-ŏch, ùh rachàuq manoh. Au jah hadrah gè tiaq trong wa bìac broq da gè, Chuaq Boc Plình doi 'màng aih.’ ”
Can Cachìt Da Ê-xê-chi-ên Broq Teo ca Wì Haq
15 I bàu Chuaq doi ca au: 16 “Ô con mangai, da'ngàc Au don đac khoi ca ìh bìac mat ìh enh ngan; mahaq ìh ùh jah rayoih, ùh hmoi, diac mat ìh ùh jah loh. 17 Toq rayoih ta manoh; paq ta-oih tìah ca i mangai cachìt. Côi mù ti gàu wa tŏc jai ti jènh beq. Paq bàng hacùng wa paq caq 'benh da mangai broq đòiq alòng.”
18 Daxroq au capoch tùang ca mangai jàn; trùh chìu mai au cachìt. Xroq atìq au broq tiaq troi bàu khoi thê ca au.
19 Jò aih mangai jàn doi ca au: “Ajoq ìh ùh anoi 'noh ca bèn bìac ìh broq aih i hiniq 'màng leq 'mòh?”
20 Au tèo bàu: “I bàu Chuaq doi ca au: 21 Anoi 'noh ca hnem Is-ra-ên beq: ‘Chuaq Boc Plình doi 'màng cô: Cô, Au padon broq amùa hnem cùh waiq Au, aih nòi pì yŏc broq catèh dèh cwìang itai, mat pì enh ngan, manoh pì enh waq; wa 'bài con calô con cadrì pì khoi đòiq hlài, èh jah tacro taiq chang gùm. 22 Jò aih pì jah broq tìah ca au khoi broq; pì ùh bàng hacùng, ùh caq 'benh da mangai broq đòiq alòng. 23 Mù pì jah đòiq hloi ti gàu, jai pì jah tŏc hloi ti jènh; pì ùh creo dang, ùh hmoi; mahaq 'bìq tagah lep taiq tôiq cla, wa pì pajùm ca dabau rayoih. 24 'Màng aih, Ê-xê-chi-ên wìa mòiq teo am ca pì; phàn bìac haq khoi broq, èh pì hadai broq. Jò rìm bìac aih trùh, pì jah loq Au cô Chuaq Boc Plình.’
25 “Ô con mangai, phàn con, hì leq Au don đac đôn hanình da wì haq, bìac lem bùi, bìac 'ngah 'ngai, bìac mat enh ngan, bìac manoh enh waq, wa yŏc con calô wa con cadrì wì haq, 26 ta hì aih jah i mangai cadàu mot lam patìn ca don ìh tàng. 27 Ta hì aih, hacùng ìh jah tapèh wa doi mangai mot tau. Ìh jah doi, ìh ùh 'bìq làu hòm. 'Màng aih, ìh wìa mòiq teo am ca wì haq; wì haq jah loq Au Chuaq.”