28
Bùa Tirò 'Bìq Taprèq
1 I hòm bàu Chuaq doi ca au: 2 “Ô con mangai, anoi ca bùa Tirò beq: ‘Chuaq doi 'màng cô:
“ ‘Taiq manoh loq catèh,
gè doi: “Au cô mòiq toq yiang,
au ha'ngui ta gèq Boc Plình,
ŏi ta'ne 'bài diac raxìq;”
'nhac ca manoh gè catèh waq ca dàng manoh Boc Plình,
gè xôq ŏi raq con mangai, ùh xài Boc Plình.
3 Cô, gè xoh dađeh yi rabiaq ca Đa-ni-ên 'mòh?
Ùh i ca bìac hlèp leq jah cadoc khoi ca gè 'mòh!
4 Gè khoi can padrŏng nhò bìac khôn rabiaq
wa bìac loq 'nì da cla gè;
khoi tah đòiq wang 'bac ta kho gè;
5 Nhò manoh khôn rabiaq broq bìac padro baxen,
gè khoi broq dèh ca bìac padrŏng jah tŏc tam.
'Màng aih manoh gè khoi catèh tŏc tam
taiq nen gè khoi can padrŏng.
6 “ ‘Taiq 'màng aih, Chuaq Boc Plình doi 'màng cô:
“ ‘Taiq manoh gè loq catèh waq
ca dàng manoh Boc Plình,
7 taiq 'màng aih, cô, Au jah broq ca 'bài mangai Diac
'noiq ngang dù yi hnao ta rìm jàn,
yòng tajraq hlài ca khôn rabiaq
wa broq amùa amech bìac 'ngah 'ngai da gè.
8 Wì haq ca'nhùt gè clìh ta hàm,
wa gè cachìt ta'ne diac raxìq,
tìah ca mangai 'bìq jêh đac.
9 Jang ngìa mangai jêh đac gè,
gè ŏi hùa doi: “Au Boc Plình 'mòh?”
Jò aih gè ŏi ta tì mangai broq ca gè loh habau aih,
gè con mangai, ùh xài Boc Plình.
10 Gè jah cachìt ta tì mangai Diac 'noiq
tìah ca 'bài mangai 'nhòq chìuq lè cat akia,
taiq Au khoi doi. Chuaq Boc Plình doi 'màng aih.’ ”
11 I hòm bàu Chuaq doi ca au 'màng cô: 12 “Ô con mangai, broq mòiq 'bŏi ca ha-on ca bùa Tirò beq wa doi ca haq: ‘Chuaq Boc Plình doi 'màng cô:
“ ‘Gè adroi khoi i tôm dìq dŏng,
bình ca bìac khôn rabiaq, lem wa gêh tôm.
13 Ìh pagah ŏi ta Êđen,
aih wùan da Boc Plình.
Ìh khoi i bình ta chac rìm hiniq ngŏc,
ngŏc gòh dùm, ngŏc wang, ngŏc kim cùang,
ngŏc ca-ah, ngŏc xenh hliang, ngŏc xenh blùc,
ngŏc gam, ngŏc ngaiq, ngŏc ajènh lam trong,
wa wang hòm Ngè broq loh clùng, broq loh taliaq;
enh hì ìh neo jah yòng khoi jah đòiq adroi.
14 Gè jah xùt dàu broq mòiq Chê-ru-bim 'nang wèq ban;
Au khoi yŏc gè tŏc ta bôi wang hadròih da Boc Plình;
gè khoi jah lam ta'ne ca 'bài pliang ngŏc 'ngah tìah ca ùnh.
15 Enh hì gè khoi jah broq loh,
trong gè gêh tôm,
trùh jò hnoq can ngang dù ta gè.
16 Gè padro baxen jah lòiq bàc,
manoh gè bình ca bìac ngang dù;
gè khoi broq tôiq, taiq 'màng aih Au khoi ca'nhùt gè
tìah ca ngè amùa loh khoi ca bôi wang Boc Plình.
Ô chê-ru-bim 'nang jah wèq ban tau,
Au jêh đac gè ŏi ta'ne 'bài pliang ngŏc 'ngah tìah ca ùnh!
17 Manoh gè khoi catèh taiq can lem gè,
wa bìac 'ngah 'ngai da gè broq raliang dèh ca can khôn rabiaq.
Au khoi ca'nhùt gè cro ta taneh.
Au jah broq gè wìa bìac ramòt ca 'bài bùa ma 'noiq.
18 Gè khoi broq amùa nòi hadròih gè
taiq tôiq gè bàc hrìn wa taiq gè padro ùh ta-atoq.
Taiq 'màng aih Au khoi broq ùnh loh enh ta'ne gè;
bùh cheo gè,
wa Au khoi broq ca gè loh blo tanùh ta crŏng taneh,
jang ngìa rìm mangai ngan hnoq.
19 Dìq dŏng ca 'bài jàn ma loq ca gè
dìq hamàih ca gè.
Gè khoi loh mòiq nen ramòt,
wa hloi hloi gè pi i hòm.’ ”
Bàu Hadrah Ca Siôn
20 I bàu Chuaq doi ca au: 21 “Ô con mangai, ngan ta ngìa pah Siđôn, wa capoch bàu doi adroi tajraq hlài ca haq beq. 22 Ìh capoch beq: ‘Chuaq Jê-hô-wa doi 'mang cô:
“ ‘Ô Siđôn, cô, Au ta'blêq ca ìh;
Au enh broq 'ngah hiniq Au ŏi ta'ne ìh.
Wì haq jah loq Au Yiang Jê-hô-wa,
jò Au broq bìac hadrah
wa pa'noh dađeh hadròih ŏi ta'ne haq.
23 Au thê can jìq blôh trùh ta Siđôn,
jah i mahem ta 'bài trong phôq haq.
'Bài mangai habau jah tacro ta haq,
taiq chang trùh ta haq tap dudan;
wa wì haq jah loq Au cô Chuaq.
24 “ ‘Jò aih pi hìaq i brech breo graiq het, hila pàc broq jìq ca hnem Is-ra-ên ta 'bài jàn ma ŏi dudan ca haq, khìn đac haq. Jò aih wì haq jah loq Au Chuaq Boc Plình.
25 “ ‘Chuaq Boc Plình doi 'màng cô: Jò Au gop hlài Is-ra-ên enh 'bài jàn ma ma Au khoi broq wì haq pac lac ta aih, Au jah pa'noh Dađeh hadròih enh trom wì haq ŏi jang ngìa 'bài jàn Diac 'noiq, èh wì haq jah ŏi dèh ta taneh ma Au khoi am dèh ca Jacôp aih hapŏng Au. 26 Wì haq jah rìh ŏi catèm; wì broq hnem, wa pìt wùan nho jah rìh hanình jò Au khoi broq bìac hadrah ca 'bài mangai ma ŏi dudan ca wì haq, aih mangai ma khìn đac wì haq. Èh wì haq jah loq Au cô Chuaq Boc Plình wì haq.’ ”