8
Chuaq Jêxu Pajàu Ha'nhèq da Bèn
1 Bìac bèn ma neo anoi trùh cô, aih 'màng cô: Bèn i mòiq Pajàu Ha'nhèq dŏng, aih Chuaq Jêxu Crich ha'ngui pah 'ma ca gèq bùa da Boc Plình ta Diac Plình, 2 'nang broq Mangai patìh ta nòi hadròih hnem cùh waiq joq 'nàng ŏi ta Diac Plình ma Chuaq broq, ùh xài mangai broq.
3 Rìm pajàu ha'nhèq jah dèch atŏc đòiq dèch am ngè tadreo ca Boc Plình, 'màng aih èh Pajàu Ha'nhèq cô hadai nhet i dahwèq đòiq dèch am. 4 Tàng Haq ŏi crŏng taneh, Haq ùh broq Pajàu Ha'nhèq, ma jah 'màng aih ŏi crŏng taneh khoi i 'bài pajàu dèch am ngè tadreo tiaq Ranenh ma hnài. 5 Wì patìh ta hnem cùh waiq ŏi crŏng taneh, aih dua 'mù patìah ca hnem cùh waiq ŏi ta Diac Plình, hadai tìah ca Môise jò haq padon broq hnem traiq cùh waiq, Boc Plình doi ca haq: “Phai broq ma lem rìm bìac tiaq dua khoi patô ca ìh ta wang Sinai.”✡ 8:5 LEA 25:40. 6 Mahaq manàiq cô Chuaq Jêxu broq mòiq bìac đang ca padèch yi hnao ca 'bài pajàu ha'nhèq, ma jah 'màng aih Haq Mangai ta'ne da wêh jao ma yi lem taiq wêh jao cô jah broq tiaq bàu hùaq yi lem.
7 Ma jah 'màng aih tàng wêh jao ma adroi khoi jah gêh tôm, èh ùh nhet ca i wêh jao ma neo atìq ca aih. 8 Mahaq Boc Plình ùh lem manoh ca con jàn Yothaiq ma tiaq wêh jao ma dùnh: Haq doi:
“Ta 'nhòng atìq cô èh,
Au broq mòiq wêh jao
ma neo ca jàn Is-ra-ên
wa jàn Juđa;
9 Ùh tìah ca wêh jao Au
ma khoi broq ca boc yaq
wì haq Ta hì Au ma rùp tì
wì haq ajèn loh khoi ca Aicàp,
Taiq wì haq ùh wèq cajap bàu wêh jao da Au,
Ma jah Au cađac wì haq, aih bàu Chuaq doi.”
10 Chuaq doi hòm:
“Cô wêh jao ma neo Au broq ca jàn Is-ra-ên:
Atìq ca 'bài hì aih,
Au jah đòiq Ranenh Au mùt ta manoh hèm wì haq,
wa achìh ta manoh wì haq,
Èh Au broq Boc Plình wì haq,
Wì haq jah broq jàn Au.
11 Ŏi ta wì haq pi i ca mangai leq ŏi hnài dèh jàn,
dèh oh daq: ‘Ep ngan loq ca Chuaq,’
Ma jah 'màng aih dìq dŏng ca wì haq,
Enh mangai dìq jaq 'yoh trùh mangai dìq jaq càn dìq canao loq ca Au.
12 Ma jah 'màng aih Au xa-ŏch ca wì haq,
baxŏng đac bìac ngang dù da wì haq,
Èh ùh hmàng tôiq lôi wì haq hòm.”✡ 8:12 Jêr 31:31–34.
13 Taiq Boc Plình khoi doi: “Wêh jao neo,” 'màng aih wêh jao ma adroi khoi dùnh, bìac cleq ma khoi dùnh pi wìa waq, padon hnhung đeh.