11
Cwìang Wèq Ta-Atoq Da Hamenh
1 I mòiq ramŏt plôh enh xèm Jêsê,
mòiq hamenh enh riah haq jah loh plì.
2 Yiang da Chuaq jah ŏi ta Haq,
aih Yiang rabiaq wa Yiang 'nì loq,
Yiang pariaq hnài wa Yiang I Cwìang Itai,
Yiang bìac loq 'nì wa loq crè ca Chuaq.
3 Haq lem bùi ta bìac loq crè ca Chuaq.
Ùh hadrah tiaq mat hnoq,
wa ùh hatình cleq tiaq don Haq tàng.
4 Mahaq Haq hadrah mangai pa xam bìac ta-atoq,
hatình da-adàng am ca mangai nan xa ta crŏng taneh.
Haq jêh crŏng taneh xam long dùi ta hacùng Haq;
xam hòi enh blìa hacùng Haq jêh đac mangai dù.
5 Haq ùh tawìh đac enh can ta-atoq wa manoh wèq dèh bàu;
aih tìah caxi nìt càt cajap ti ca'nam Haq.
6 Jò aih coq yiang jah ŏi pajùm ti trìu,
'beo jah ŏi pajùm ti bubi; 'bo con,
baco hlari wa 'bo bech jah ŏi pajùm ti dabau
wa mòiq ngai mangai 'yoh ja dùi 'bài ngè aih.
7 'Bo can jah acaq ti higàu;
'Bài con wì haq jah ca'nùng pajùm;
baco hlari jah caq nhat tìah ca 'bo.
8 Con 'yoh ŏi ùq jah pagôq baxùh ti nòi trom bìh tùa,
con 'yoh bu cađac tôh jah 'bŏc tì mùt ta trom bìh plŏng.
9 Wì haq ùh broq 'mèq loq broq raliang đac dabau
ta bôi wang hadròih Au,
ma jah 'màng aih bìac loq 'nì ca Chuaq bình halùih
'màng ca diac glàp diac raxìq.
Sôq Jàn Xrong Jah Ha'naoq Hlài
10 Ta hì aih, riah enh Jêsê jah yòng broq teo ca 'bài jàn; 'bài diac jah chaq Haq, wa nòi Haq ŏi jah 'ngah 'ngai. 11 Ta hì aih, Chuaq jah hnhu tì mòiq yàng hòm broq hlài jàn Haq ma ŏi xrong, aih jàn ma ŏi hlài enh A-si-ri, enh Aicàp, enh Patrô, enh Ê-thi-ô-bi, enh Êlam, enh Si-nê-a, enh Hamat wa 'bài pleo da diac raxìq.
12 Chuaq jah pa'nàng mòiq teo hadro ca 'bài Diac.
Haq gop hlài 'bài mangai 'bìq yŏc 'noh enh Diac Is-ra-ên,
wa 'bài mangai pac lac da Juđa
enh pôn pah crŏng taneh.
13 Èh Ep-ra-im pi ŏi tarènh hòm.
'Bài mangai ma jùq jàm Juđa jah cachìt;
Ep-ra-im pi ŏi tarènh ca Juđa,
Juđa pi ŏi jùq jàm Ep-ra-im.
14 Mahaq Ep-ra-im wa Juđa jah loh tajêh jàn Phi-li-tin ŏi pah mat mahì mùt;
wa haq pajùm ca dabau tablah yŏc cùng hang jàn pah mat mahì loh.
Wì jah ta'blêq ca Êđôm wa Moap,
hi khoi wì haq wèq jàn Amôn.
15 Chuaq jah broq trong croh cwa diac raxìq Aicàp wa xam cayeo bùh cheo;
Haq hnhè tì ta diac cròng U-phra-tê,
chon haq loh tapèh toq diac
đòiq wì lam cwa ùh 'bìq hajàh diac.
16 Wa jah i mòiq toq trong ca jàn ŏi xrong hlài da jàn Haq,
aih jàn ŏi xrong hlài enh A-si-ri,
'màng ca khoi i ca Is-ra-ên
ta hì wì loh khoi enh taneh Aicàp.