56
Nhò Dì Tiaq Bàu Boc Plình, Wì Jah Xôq Ramŏt
1 Chuaq doi 'màng cô:
“Wèq trong jang,
wa broq bìac ta-atoq beq;
taiq bìac dèch claih da Au ten trùh,
bìac ta-atoq da Au ten jah pa'noh loh.
2 Xôq ramŏt ca mangai broq bìac aih,
wa mangai ma wèq cajap bìac aih,
wèq hì Sabat đòiq ùh hìaq broq padrùh,
padràng dèh tì ùh broq mòiq bìac dù leq!”
3 Mangai diac 'noiq khoi jah ŏi ta Chuaq ùh khòh doi:
“Chuaq ùh lah au khoi enh jàn Haq.”
Mangai khoi pah hadai ùh khòh doi:
“Cô, au long croh.”
4 Ma jah 'màng aih Chuaq doi 'màng cô:
“ 'Bài mangai ma xon loq wèq 'bài hì Sabat Au,
ràih bìac lem manoh Au,
wèq cajap wêh jao Au.
5 Èh Au jah am ca wì haq mòiq nòi ta hnem,
ta pagia phôq Au, wa am ca wì haq mòiq toq hiniq
yi lem ca hiniq con adrùh con radam;
Au am hòm ca wì haq mòiq toq hiniq hloi hloi,
ùh jò leq 'bìq xùt đac.
6 'Bài mangai Diac 'noiq hadai hlài ta Chuaq
đòiq patìh Haq,
đòiq loq waq hiniq Chuaq,
đòiq broq hapŏng Haq;
aih dìq ca 'bài mangai wèq hì Sabat đòiq claih ca padrùh,
wa wèq cajap wêh jao Au,
7 èh Au 'ràng wì haq tŏc ta wang hadròih da Au,
wa broq ca wì haq lem bùi ta hnem waiq khàn da Au.
Ngè tadreo bùh wa ngè tadreo ma wì haq dèch am ta ca'bŏng tadreo Au,
Au jah nhàn yŏc,
taiq hnem Au jah doi:
Aih hnem waiq khàn ca rìm jàn.”
8 Chuaq Boc Plình,
Haq gop jàn Is-ra-ên ma pac lac, doi:
“Enh gùng ca 'bài mangai khoi jah gop,
Au xôq ŏi gop hòm 'bài jàn 'noiq hlài ta wì Au khoi tagop.”
Trech Mangai Is-ra-ên Blàq Blènh
9 Ô 'bài ngè ta đùng,
'bài ngè ta rôm, dìq dŏng lam trùh caq beq.
10 'Bài mangai yòng gŏc da Is-ra-ên dìq khoi ùh xao hnoq;
dìq ca wì ùh 'nì cacleq.
Dìq dŏng ca wì haq coq làu,
ùh jah co;
toq enh cùi,
wa apô.
11 Wì haq 'bài coq ham ca caq, ùh 'nì panàc.
Aih 'bài mangai ban trìu ùh rabiaq;
rìm ngai tiaq dèh trong crài da cla wì,
rìm ngai wì chaq đeh hra lòiq ca dađeh,
mangai leq hadai 'màng aih.
12 Wì haq adràc dabau: “Trùh beq, èh au yŏc alac,
bèn jah bù ca alac jìang;
hì da èh tìah ca hì cô,
rahù yi hnao hòm.”