65
Con Jàn Blàq Blènh
1 “Au am ca mangai pagah adroi ùh waiq bòch Au, èh jah bòch Au;
Au am ca mangai pagah adroi ùh ti chaq Au èh jah glàm Au.
Au khoi doi ca mòiq jàn 'nhòq lah creo dang hiniq Au:
‘Au ta cô, Au ta cô!’
2 Xèq ca hì Au khoi hnhu tì ta ngìa
ca mòiq jàn ma blàq blènh,
'bài mangai lam trong ùh lem,
tiaq dèh manoh cla,
3 aih jàn ùh hêq ca taleoq Au
ŏi jang ngìa Au;
wì haq dèch am ngè tadreo ta 'bài wia,
bùh nhŏng ta 'bài ha'ngùc gech,
4 Wì ha'ngui ta ralùng hanang,
jò damang wì ŏi ta nòi hlèp,
caq jam chùa,
wa ùc diac jam ramòt ta dòt hadròih wì haq.
5 Wì haq hùa doi: ‘Yòng nòi crài beq,
apaq thia haten ca au, taiq au yi hadròih ca ìh!’
'Bài mangai aih nhòi nòi mùh Au,
tìah ca ùnh cheo xèq ca hì.
6 “Cô bìac khoi jah achìh ŏi jang ngìa Au,
Au ùh ŏi hatenh, mahaq Au tabroq hlài;
joq 'nàng Au tabroq hlài 'mùt ta achong wì haq,
7 Tôiq da wì wa tôiq da boc yaq wì,
aih 'bài mangai khoi bùh jreo xua thùm ta 'bài bôi wang,
wa capoch đùng trùh Au ta 'bài bôi go;
'màng aih Au jah tŏng tah hlài ta achong wì haq rìm
bìac cla wì haq khoi broq adroi nèh.”
Chuaq doi 'màng aih.
8 Chuaq doi 'màng cô:
“Jò wì hnoq diac nho ta ayùm plì nho,
èh doi: ‘Apaq raliang đac,
taiq ta plì aih i xôq ramŏt lem;’
Au hadai broq 'màng aih taiq nen 'bài hapŏng Au,
đòiq Au ùh hìaq raliang đac dìq dŏng.
9 Au broq mòiq xinoi loh enh Jacôp,
wa mòiq ngai hatìa 'bài wang Au loh enh Juđa;
'bài mangai Au ma ràih aih jah hùang gùng aih,
'bài hapŏng Au jah ŏi ta aih.
10 Ta jàn Au,
'bài mangai leq khoi chaq Au,
jah yŏc đùng Sarôn broq nòi ban calùh trìu,
thòng tamang Acô broq đùng nhat ban calùh 'bo.
11 “Phàn pì 'bài mangai khoi cađac Chuaq,
khoi hèt ca wang hadròih da Au,
padon ngè tadreo ta ca'bŏng can kiac Gat,
wa pùc alac ca can kiac Pajaq;
12 Au pajaq chang gùm trùh ta pì,
dìq dŏng ca pì cùp gàu đòiq chìuq wì jêh đac;
Taiq Au khoi creo, pì ùh tèo,
Au khoi capoch, pì ùh tamàng,
pì khoi broq bìac dù ŏi jang ngìa Au,
khoi ràih bìac ùh lem ca manoh Au.”
13 Taiq 'màng aih, Chuaq doi:
“Cô 'bài hapŏng Au caq,
phàn pì ep pangot;
cô 'bài hapŏng Au ôq,
phàn pì ep croh ranŏng;
cô 'bài hapŏng Au jah lem bùi,
phàn pì ep camaih;
14 Cô hapŏng Au jah calêu lem bùi
taiq manoh bình halùih can lem bùi,
phàn pì èh creo bàu dêh taiq manoh mango,
hràng rayoih taiq mahua yiang mango.
15 Hiniq pì jah don hlài
đòiq 'bài mangai jah ràih da Au broq bàu hanip;
Chuaq jah jêh đac ìh,
mahaq Haq jah creo dèh ca 'bài hapŏng xam mòiq toq hiniq 'noiq.
16 Taiq 'màng aih, cabô ŏi ta crŏng taneh waiq xôq ramŏt loq pachac bìac cleq,
èh jah canòm Boc Plình da bàu joq 'nàng.
Taiq bìac nan xa adroi nèh khoi 'bìq hèt
khoi hnhung hlèp ca mat Au.”
Plình Wa Plì Taneh Ma Neo
17 “Cô, Au jah broq
plình neo taneh neo;
bìac adroi pi hmàng hòm,
pi ràu hòm.
18 Mahaq manè wa lem bùi hloi hloi
ca bìac Au khoi broq loh;
cô Au khoi broq Jê-ru-sa-lem am ca can lem bùi,
wa jàn phôq aih am ca bìac manè.
19 Au jah lem bùi ca Jê-ru-sa-lem,
Au jah lem bùi ca jàn Au;
nòi aih pi i hòm ca bàu hmoi,
cachech.
20 “Ta aih pi i ca con 'yoh cachìt ŏi nga,
hadai ùh hìaq i mangai craq rìh ùh lùch dèh ca 'nhòng;
ma jah 'màng aih cachìt jò mòiq hrinh hanam ŏi thì,
ngan mangai rìh bu mòiq hrinh hanam aih haq 'màng ca mangai 'bìq cađac.
21 Jàn Au broq hnem jah ŏi,
pìt nho jah caq plì.
22 Wì haq ùh broq hnem am ca mangai 'noiq ŏi,
ùh pìt nho am ca mangai 'noiq caq;
ma jah 'màng aih hanam
jàn Au jah tìah ca hanam long,
'bài mangai Au ma ràih
jah hùang dèh bìac tì cla broq loh.
23 Wì haq abroq ùh hìaq 'ngwan,
pi hìaq xa-ông con đòiq glàm bìac ranàc,
taiq wì haq wa con xau
wì haq xinoi Boc Plình am xôq ramŏt.
24 Au rùp bàu wì haq adroi ca creo dang Au;
wì haq ŏi anoi, Au khoi tàng.
25 Coq yiang wa trìu jah acaq pajùm,
baco hlari caq hri tìah ca 'bo,
bìh caq blo taneh.
Ùh i ca cabô broq habau,
loq raliang đac ta wang hadròih Au,”
Chuaq khoi doi 'màng aih.