7
Ùac Aiq Can Rìh Da Jop 'Ngwan
1 “Ŏi ta crŏng taneh, con mangai ma pi ep patìh achap 'mòh?
'Bài hì haq ma ùh tìah troi 'nhòng rìh da mangai abroq caq cùng 'mòh?
2 'Màng ca mangai hapŏng ngèh enh mùt ta yàp,
'màng ca mangai abroq caq cùng ngèh dèh ca 'bac baha.
3 Hadai 'màng aih,
khoi jah tình ca au 'bài hì khê 'ngwan ùh i ca lòiq cleq wa 'bài mang xalep.
4 Jò au ca'nùng cùi, èh au doi: ‘Jò leq au ma rìu?’
Mahaq damang xôq ŏi hloi, èh au ra-èu trùh daxroq.
5 Hrai wa taneh glom xech au;
akia au hađah loh đùh!
6 “ 'Bài hì mang au cadàu renh yi hnao ca xia ma cadrenh brai, khoi trùh lùch,
tìah ca xia dìq ca brai, aih tìah ca 'bài hì mang au ùh jah ngèh gòm cleq.
7 Chuaq ôi, xìn hmàng 'nhòng rìh da au bu dàng hòi hihèm;
mat au pi jah hnoq xôq ramŏt hòm.
8 Mat leq khoi lah hnoq au, èh pi hnoq au hòm.
Mat Chuaq ha'miang chaq au, mahaq pi i ca au hòm.
9 Yùc prai wa hnhung 'màng leq,
mangai khoi loh ta ralùng hadai ùh jah wìh hlài.
10 Haq pi jah hlài dèh ta hnem hòm,
gùng haq ma ŏi pi canao ca haq.
11 “Taiq 'màng aih, au ùh jah bàt dèh bàu hacùng,
jò can ranàc trùh ta manoh au, au capoch 'noh; jò mahua yiang au xa ca ŏi, au mamùc.
12 Au anoi ca Boc Plình: Au ma xài diac raxìq,
au ma xài ngè càn caiq ta diac raxìq, Ìh ep 'nac đòiq mangai gòm rap au?
13 Jò au hèm: Jùang au jah alòng au,
jò au cùi can ranàc au yi hèo,
14 Èh Chuaq broq ca au cadrat nhò bìac apô,
wa broq ca au yùq crè nhò can mahno.
15 Mahua yiang au ràih bìac pat hihèm,
cachìt yi hnao ca rìh 'nang chìuq can jìq cô.
16 Au rai dùnh rai cachìt; au ùh jah rìh hloi.
Xìn Chuaq đòiq au ŏi mòiq ngai; ma jah 'màng aih 'bài hì rìh da au tìah ca hòi hihèm.
17 “Con mangai aih cleq ma Chuaq padèch haq?
Gleq Chuaq loq lo ca haq?
18 Loq thia hmàih ca haq rìm xroq
wa thù haq rìm jò?
19 Jò leq Chuaq ùh ngan au hòm
wa đòiq au hatenh trùh jò au lŏn dèh diac hai 'mòh?
20 Ô Chuaq ma wèq ban con mangai, Au khoi broq tôiq,
loq khoi broq bìac cleq ùh troq ca Ìh? Gleq Chuaq ma đòiq au broq nòi axràm penh, èh au loh genh trap ca cla au wa Ìh hòm?
21 Gleq Chuaq ùh baxŏng tôiq da au, cađac ngan dù khoi ca au?
Ma jah 'màng aih ùh dùnh hòm au cùi ta blo taneh;
èh Chuaq jah chaq au, mahaq pi i ca au hòm.”