10
Jop Mango Ca Bìac Boc Plình Broq
1 “Au khoi mech dèh ca can rìh;
au ca hloh bàu hràng ùh hêq;
au anoi 'noh bìac pagau pagùa da manoh au.
2 Au jah bòch Boc Plình: Xìn paq baxa au;
xìn pa'noh ca au loq taiq bìac cleq Chuaq ma ta'mòq tôiq ca au.
3 Chuaq lem manoh padit au 'mòh,
khìn đac bìac tì cla Ìh khoi broq loh,
èh mòiq manoh ca bìac pađim da mangai dù 'mòh?
4 'Mang aih Chuaq i mat xam chac xech,
èh ngan hnoq troi con mangai ngan 'mòh?
5 'Bài hì da Chuaq hadai rìh tìah ca 'bài hì da con mangai,
wa 'bài hanam da Chuaq hadai tìah ca 'bài hanam da con mangai 'mòh?
6 Gleq Chuaq ma chaq bìac dù da au, wa ti chèh waq ca jah hnoq tôiq lôi au?
7 'Nhac ca Chuaq khoi loq ca au ùh broq tôiq,
mahaq ùh i ca cabô jah dèch au claih enh tì Chuaq?
8 “Tì Chuaq khoi broq au, khoi mŏt loh chac au,
mahaq tì Chuaq wìh hlài raliang đac au!
9 Xìn Chuaq hmàng Chuaq khoi mŏt au xam taneh;
Gleq manàiq Chuaq enh broq au mùt hlài ta blo taneh?
10 Ma ùh xài Chuaq khoi ùc au tìah ca ùc sùa,
broq au loh ca nhin tìah ca 'benh sùa?
11 Chuaq khoi am ca au akia wa xech,
yŏc caxènh wa hwen tenh loh au.
12 Chuaq khoi am ca au can rìh, wa can xa-ŏch xam manoh loq waq;
bìac wèq ngan da Chuaq khoi wèq ban mahua yiang au.
13 “Mahaq Chuaq cadoc bìac cô ta manoh;
au loq bìac cô manoh enh da Ìh.
14 Tàng au broq tôiq, Chuaq jah ngan hnoq,
Haq ùh baxŏng tôiq da au.
15 Tàng au broq ngang dù, joq nan xa ca au!
Tàng au caq ŏi ta-atoq, au xôq ùh hùa ngoi gàu tŏc,
taiq au bình halùih bìac camaih
wa khoi canao loq bìac mango.
16 Tàng au ngoi gàu, tìah ca baco hlari, Chuaq ti axan au,
wa patô bìac halac càn caiq da Ìh đòiq tajraq hlài ca au.
17 Chuaq hloi hloi i nen đòiq tajraq hlài ca au,
pabàc tam can nòih ca au,
can jìq xa wa can xalep ta'boi dabau tiaq yôt au!
18 “Gleq Chuaq ma 'noh au loh khoi enh cliac miq au?
Au ngèh enh au khoi cachìt jò aih, èh ùh i ca mat leq hnoq au!
19 Ngèh enh 'nhòq lah i au,
clìh enh cliac miq loh hloi ta ralùng hanang!
20 'Bài hì da 'nhòng rìh au khoi ten dìq.
'Màng aih Chuaq ôi, xìn loh khoi ca au beq, đòiq au jah catèm toq 'biaq.
21 Adroi ca jò au loh lam trùh nòi au pi jah wìh hlài hòm,
aih nòi clam clôiq nòi dua 'mù da can cachìt.
22 Aih nòi clam clôiq ùh xao hnoq,
nòi can cachìt wèq cwìang, i toq can manhài ŏi ta aih,
'ngah hadai bu dàng clam clôiq.”