17
Jop Doi: Mangai Loq Jù Lê Haq
“Mahua yiang au mango dìq jaq;
'bài hì da au cô èh dìq; ralùng hanang khoi gòm đòiq au!
'Bài mangai do lê dudan ca au,
mat au hnoq wì taleoq ca au.
 
“Xìn Chuaq am hnoq joq 'nàng Ìh wèq ban au, ma jah 'màng aih enh gùng ca Chuaq cabô jah yòng wèq ban au?
Chuaq broq ca manoh wì ùh jah loq 'nì,
taiq Chuaq ùh enh padèch wì ha'nhèq.
Mangai leq ta'mòq tôiq dèh ca bua taiq jah cùng baha,
con caiq haq hlat taiq ùh i dahwèq caq.
 
“Mahaq Boc Plình broq ca au loh bìac đòiq wì jù lê;
wì gahiac cachôh ta hadrò au.
Mat au loh ca pònh taiq au mango hrìn;
jènh tì au dìq ragìq broq ca au bu dàng 'mù.
Mangai lem jang ngan au, èh hamàih;
mangai ùh i ca tôiq jah nòih ca mangai ngang dù.
Mahaq mangai ta-atoq jah cajap dèh ta trong cla;
mangai i tì lem hreo rai èh rai jah tadêh.
 
10 “Dìq ca pì phai i bàu rahen yi ragài hòm beq;
mahaq au hnoq ŏi ta pì ùh i ca mangai leq rabiaq.
11 'Nhòng rìh au cô èh dìq, trong hèm ca broq da au cô èh raliang,
trong au ngèh gòm èh lùch.
12 Wì doi damang loh dahì; ŏi jò clam clôiq,
wì doi can 'ngah ten trùh.
13 Tàng au gòm canòm ca ralùng hanang broq hnem au,
au roh đòiq dèh jùang au ta nòi clam clôiq;
14 Tàng au creo ca ralùng hanang: ‘Ìh baq au,’
wa doi ca hrai: ‘Pì miq’ wa ‘daq cadrì da au,’
15 'màng aih èh bìac au ngèh gòm canòm ŏi ta leq?
Cabô jah hnoq bìac ngèh gòm da au ta leq ùh?
16 Jò au jah padài ta blo taneh,
èh bìac gòm canòm jah loh ta ralùng hanang tiaq au.”