33
Ê-li-hu Xoh Dèh Haq Pa'noh Bàu Thai Ca Boc Plình
1 “Manàiq Ô Jop, xìn ìh tamàng au capoch.
Halang don tamàng bàu au.
2 Cô au bu hah hacùng,
rapet au ta hacùng capoch.
3 Bàu au capoch 'noh dèh bìac lem jang da manoh au;
bìac au loq rapet au capoch 'noh ro rang.
4 Yiang Boc Plình khoi broq loh au,
hihèm da Chuaq I Cwìang Itai Dìq Dŏng am ca au can rìh.
5 Tàng jah, xìn ba capoch tùang ca dabau beq;
yòng pa'noh bàu ìh jang ngìa au beq!
6 Ngan beq, jang ngìa Boc Plình, au ùh i crài ca ìh;
au hadai khoi jah broq loh xam taneh nhin.
7 'Màng aih, xìn ìh paq ra'ngòt, paq crè,
au ùh padit ìh jò leq.
8 “Don au khoi tàng bàu ìh capoch,
au khoi tàng bàu ìh doi:
9 Au lem hreo, au ùh lah broq tôiq;
Au ùh i ca tôiq, wa ta manoh au ùh hèm ca trong ngang dù,
10 'nhac ca 'màng aih, Boc Plình chaq hnoq hiniq đòiq baxa au;
ngan au tìah ca mangai tagit ca Haq,
11 Haq clang jènh au,
gòm rap ngan rìm trong au lam.
12 “Au xìn doi ca ìh, ìh capoch 'màng aih ùh troq;
ma jah 'màng aih Boc Plình yi càn caiq enh 'nhèq dìq dŏng ca con mangai.
13 Gleq ìh ma hùa tarahen ca Haq,
trech Haq taiq Haq ùh tèo bàu ìh?
14 Ma jah 'màng aih Boc Plình capoch hnài mòiq yàng,
loq baiq yàng; mahaq con mangai ùh waq tamàng.
15 Haq capoch ta bìac apô, ta can mahno hnoq damang, jò wì cùi jìang, jò wì ca'nùng cùi dèh ta jùang,
16 Haq pèh don mangai,
yŏc bàu Haq ma hnài wa pa'yèp wì loq yùq,
17 đòiq con mangai cađac bìac dù wì ma tình broq,
đòiq wì haq cađac manoh loq catèh;
18 đòiq jah dèch mahua yiang wì claih khoi enh nòi hàm jrùq,
đòiq jah wèq 'nhòng rìh wì haq claih khoi ca ralùng hanang.
19 Chuaq baxa con mangai, broq ca wì jìq xa ta jùang,
caxènh wì tarìt hloi hloi,
20 trùh 'mòi bìac acaq xôq ramòt,
ngè jìang loh ca mech da ìa.
21 Chac hamac haq jrêh jrep,
ragìq ragôm toq caxènh wa akia.
22 Mahua haq khoi trùh nòi hàm jrùq,
can rìh da haq gòm can cachìt trùh đìh yŏc.
23 “Tàng jò cô i 'Bình Plình,
tìah ca Mangai loh Ŏi Ta'ne, mòiq toq raq ŏi ta mòiq ngŏng,
đòiq bahmàng ca mangai trong leq troq,
24 èh xa-ŏch ca haq, wa waiq dang Boc Plình:
‘Xìn dèch haq claih enh nòi hàm jrùq,
au khoi chaq jah bìac rŏt dèch haq.’
25 Đòiq chac xech haq wìa i padren lem yi hnao ca jò ŏi radam;
haq jah hlài padren jò ŏi 'yoh.
26 Haq creo dang èh Boc Plình rùp bàu;
haq cùh waiq Chuaq xam bàu lem bùi,
ma jah 'màng aih Boc Plình am hlài ca con mangai bìac ta-atoq da Haq.
27 Haq calêu wa anoi 'noh enh ngìa ca rìm ngai:
‘Au khoi broq tôiq wa khoi loh khoi ca trong lem jang, trong troq, mahaq Boc Plình khoi baxŏng tôiq ca au, ùh baxa tajì dèh ca tôiq da au.
28 Haq dèch au claih khoi ca hàm jrùq,
am ca au jah lem bùi rìh tiaq trong can 'ngah.’
29 “Joq 'nàng Boc Plình broq rìm bìac aih ca con mangai,
bàc yàng,
30 đòiq jah 'ràng mahua yiang con mangai jah loh khoi enh hàm jrùq,
đòiq jah xreo 'ngah can 'ngah da can rìh.
31 “Boc Jop ôi! Ìh tamàng bàu au oq,
ìh hatenh đòiq au jah anoi 'noh.
32 Èh tàng ìh enh tèo hlài cleq, anoi beq,
ma jah 'màng aih au loq enh tamàng bàu ìh anoi dađeh ùh pòq tôiq cleq.
33 Tàng ùh, xìn ìh tamàng au oq;
xìn ìh hatenh đòiq au hnài ìh bìac khôn rabiaq.”