3
Tiaq Khôn Rabiaq 'Noh Loh Xôq Ramŏt
1 Ô con, paq hèt ca bàu au pariaq hnài,
mahaq wèq bàu thê da au ta manoh con oq;
2 Ma jah 'màng aih, bìac aih jah am ca con rìh tam bàc hì,
sôq hanam 'nhòng rìh, wa can catèm.
3 Paq đòiq can xa-ŏch wa bàu joq 'nàng lam khoi ca con;
bac haq ti ranŏng, achìh mùt ta manoh dađeh.
4 'Màng aih, ŏi jang ngìa Boc Plình wa con mangai,
con jah xôq wa can khôn rabiaq joq 'nàng.
5 Dìq ca manoh canòm nhò Chuaq beq,
paq canòm nhò can 'nì loq dađeh;
6 Ta dìq bìac broq da con, khòh loq ca Haq,
Haq broq am ca con 'bài trong jang.
7 Paq khôn rabiaq tiaq dèh mat ngan hnoq; iu crè ca Chuaq,
wa cađac trong dù beq:
8 'Màng aih, chac con jah tadêh,
caxènh con jah gang hagao.
9 Phai loq iu Chuaq xam bìac can padrŏng
wa dahwèq gàu mùa da con beq;
10 'Màng aih, 'bài hapom da con jah bình halùih,
wa thùng da con jah bình halùih alac nho neo.
11 Ô con, paq khìn bìac pariaq baxa da Chuaq,
paq yŏc manoh git bìac lech da Haq;
12 Ma jah 'màng aih Chuaq xa-ŏch ca cabô, Haq pariaq hnài mangai aih,
tìah ca mangai baq broq dèh ca con calô haq xa-ŏch.
13 Mangai leq chaq jah can khôn rabiaq,
wa jah can 'nì loq, i xôq ramŏt!
14 Ma jah 'màng aih thai jah haq yi hnao ca jah 'bac jèn,
can lòiq haq xa-ông loh yi lem ca wang lem.
15 Can khôn rabiaq canaq yi hnao ca ngŏc,
ùh i cleq con enh waq achùa ma dàng ca haq.
16 Tì pah 'ma haq wê can halình,
tì pah 'ngeo haq i can padrŏng wa 'ngah 'ngai.
17 'Bài trong haq aih trong lem,
wa 'bài trong haq dìq catèm.
18 Haq long can rìh am ca mangai leq cadop yŏc haq;
mangai leq cadop yŏc haq cajap dìq jah xôq ramŏt.
19 Chuaq yŏc can khôn rabiaq broq plì taneh;
yŏc bìac loq 'nì ta'mroq 'bài lòp plình.
20 Taiq bìac 'nì loq da Haq, 'bài thòng jrùq tapèh,
yùc acom loh diac ngom.
21 Ô con, khòh wèq can khôn rabiaq joq 'nàng wa loq hèm trong broq troq,
paq đòiq haq hangai ca mat con;
22 Haq jah loh can rìh ca mahua yiang con,
wa tìah ca ngè anì ca ranŏng con.
23 Èh con jah cadiang lam cajap ta trong
wa jo con ùh catŏih tacro.
24 Jò con ca'nùng, ùh i bìac crè yùq;
joq 'nàng con jah ca'nùng cùi jìang.
25 Paq crè bìac ramòt lam trùh da'ngàc,
hadai paq crè jò bìac broq raliang trùh enh mangai dù;
26 Ma jah 'màng aih Chuaq wìa nòi hanình con jah canòm;
Haq jah wèq jo con claih ca hlech gùi.
27 Paq ùh broq bìac lem ca mangai leq ma đang ca broq,
jò tì con jah broq bìac aih.
28 Tàng con i dahwèq ma mangai haten ca con 'nang nhet,
èh con paq doi ca haq: “Lam beq, èh hlài, hì da èh au am ca ìh.”
29 Paq chaq trong broq raliang đac mangai haten da con,
jò haq 'nang ŏi rìh catèm ti con.
30 Tàng mangai ùh i broq 'mèq leq ca con,
con paq ta'miaq ca haq.
31 Paq tagrình ca mangai ngang dù,
hadai paq ràih trong leq da haq;
32 Taiq Chuaq ramòt ca mangai ùh lem jang;
mahaq Haq broq bua ca mangai lem jang.
33 Bìac hanip da Chuaq ùc ta hnem mangai dù;
mahaq Haq am xôq ramŏt ca nòi ŏi da mangai rìh ta-atoq.
34 Haq halê mangai loq halê;
mahaq Haq am can khôn rabiaq ca mangai loq paha'neq dađeh.
35 Mangai khôn rabiaq jah hùang bìac loq iu;
mahaq mangai blùng pa'noh loh bìac ùh loq iu.