5
Bìac Tango Anang Broq Ca Mangai Clìh Ta Hlech
1 Ô con, cachang bìac khôn rabiaq au beq,
cachình don tamàng bàu 'nì loq da au beq;
2 Đòiq con loq hèm trong broq troq,
wa blìa hacùng con jah anoi 'noh bìac 'nì loq.
3 Taiq blìa hacùng gu cadrì tango anang hoch loh diac mat,
wa blìa hacùng haq raho yi hnao ca dàu;
4 Mahaq trùh jò pulùch haq xang tìah ca pagiang xang,
hin tìah ca pla chang gùm hin baiq pah.
5 Jènh haq loh ta nòi cachìt;
cadiang haq 'nong trùh ta ralùng hanang.
6 Haq ùh hèm haboq ca trong da can rìh;
'bài trong haq lam aih khoi tayŏih, mahaq haq ùh 'nì.
7 'Màng aih manàiq, ô 'bài con, tamàng au beq;
apaq cađac 'bài bàu da hacùng au.
8 Wèq trong da con hangai ca haq beq,
paq lam haten ca 'mang hnem haq;
9 Yùq con am dèh 'bang tìang ca mangai 'noiq,
wa am hanam con ca mangai dù dang;
10 Yùq mangai 'noiq jah caq panàc cùng hang con,
wa cùng padren con hlài ta hnem mangai 'noiq;
11 Yùq trùh pulùch con ep hràng rayoih,
taiq xech wa chac hamac con loh ca lep tagah.
12 Khoi èh con doi: “Gleq au git ca bàu hnài pariaq,
wa manoh au khìn đac bàu lech?
13 Gleq au ùh iu bàu thài hnài,
wa ùh tamàng 'bài mangai hnài au?
14 Au jêq 'bìq hù hech ŏi ta'ne mangai jàn
wa mangai tagop.”
15 Con phai ôq diac ta đàp con
wa diac loh enh adràm da con.
16 Khòh ùc diac da con hìu loh enh gùng,
wa 'bài diac da con hìu loh nòi phôq chòq ùh?
17 Haq khòh ŏi ta mòiq ngai da con,
apaq axong haq ca mangai 'noiq.
18 Waiq xèm tamŏc da con jah xôq ramŏt;
lem bùi dèh ti mai con ma yŏc jò ŏi thì aih beq,
19 Ngan haq tìah ca jŏi lem ca enh, wa tìah ca kêh lem lình,
ngèh enh ca tôh haq broq ca con bùi manoh hloi hloi,
wa can loq waq haq broq ca con bình can loq waq hloi hloi.
20 Ô con, gleq con ma enh waq ca gu cadrì tango anang,
wa ca'muq catong ca gu cadrì ma 'noiq?
21 Ma jah 'màng aih rìm bìac broq da mangai, dìq ŏi jang ngìa Chuaq;
Haq ngan hnoq rìm trong da con mangai.
22 Mangai ngang dù jah 'bìq dèh bìac ngang dù cla rùp yŏc,
èh haq 'bìq dèh caxi tôiq lôi cla càt grap.
23 Haq cachìt taiq haq thìuq ca bàu hnài;
haq lac trong taiq haq blùng awàt.