22
Can Rìh Wa Caq Ŏi 'Màng Leq
1 Mangai i 'bang tìang lem yi hnao ca bàc 'bac,
wa bìac loq hanò ca mangai, lem yi hnao ca 'bac wa wang.
2 Mangai padrŏng can wa mangai pa, dìq i bìac tìah ca dabau:
Chuaq khoi broq loh wa dìq baiq.
3 Mangai wèq dèh manoh hèm hnoq bìac ranàc, èh cadoc dađeh;
mahaq mangai blùng xôq lam hloi, wa glàm bìac nan xa.
4 Cùng baha da bìac Manoh paha'neq dađeh joq 'nàng wa bìac crè yùq ca Chuaq,
aih bìac can padrŏng, bìac jah padèch, wa can rìh.
5 Ta trong mangai amòng i hila wa gùi;
mangai leq wèq dađeh jah wia hangai.
6 Hnài con 'yoh trong haq khòh tiaq beq;
'nhac ca trùh craq, haq xôq ùh wia khoi ca trong aih.
7 Mangai padrŏng can wèq cwìang mangai pa;
mangai bòch đò wìa hapŏng da mangai am wai.
8 Mangai leq rai bìac ùh ta-atoq jah gat bìac ranàc;
long wèq cwìang da haq jah tagoh đac.
9 Mangai leq i manoh rùng rai, jah xôq ramŏt,
taiq haq am dèh 'benh ca mangai pa.
10 Drùh đac mangai loq halê beq, èh bìac tarahen hadai jah loh lam đac;
bìac ta'miaq wa bìac broq ca dabau camaih jah dìq đac.
11 Mangai leq enh waq ca manoh lem hreo wa bàu rangot,
jah broq bua da bùa.
12 Mat Chuaq blèch ngan mangai i can loq 'nì,
mahaq Haq ca'nhùt tacro đac bàu mangai blàq blènh.
13 Mangai aroh doi: “I baco hlari ŏi ta gùng aih;
au 'bìq cachìt ti trong!”
14 Hacùng bàu da gù cadrì tango anang, aih ralùng jrùq;
mangai leq 'bìq Chuaq hanip, jah taclìh ta aih.
15 Bìac blùng càt ta manoh con 'yoh;
mahaq long roi hnài pariaq jah hnan đac bìac aih wia hangai ca haq.
16 Mangai leq padit padiang mangai pa đòiq broq ca dađeh padrŏng can,
wa mangai am ngè rŏt manoh ca mangai padrŏng can, haq jah wìa mangai pa.
Bàu 1
17 Nhet halang don tamàng bàu mangai khôn rabiaq oq,
khòh 'nac dèh manoh ta bìac loq 'nì au oq;
18 Ma jah 'màng aih ìh jah lem bùi jò wèq bàu aih ta manoh ìh,
đòiq bàu aih jah hamang ti hacùng ìh.
19 Hì cô au khoi hnài am ca ìh loq bìac aih,
đòiq ìh i manoh lùi canòm Chuaq oq.
20 Ùh xài au khoi achìh ca ìh bàu lem dìq jaq,
hnài pariaq wa can loq 'nì 'mòh?
21 Đòiq broq ca ìh loq bìac troq wa bàu joq 'nàng,
đòiq ìh anoi hlài bàu joq 'nàng ca 'bài mangai thê ìh?
Bàu 2
22 Paq tablah yŏc dahwèq da mangai pa, taiq wì haq pa,
hadai paq padit padiang mangai nan xa ti nòi 'mang phôq;
23 Ma jah 'màng aih Chuaq yòng pah wì haq,
wa yŏc đac can rìh da mangai leq ma tablah yŏc dahwèq wì haq.
Bàu 3
24 Apaq broq bua ca mangai loq nòih;
paq pajùm ca mangai dù,
25 èh ìh loq lam tiaq trong wì haq,
'màng aih ìh jah 'bìq hlech rahoch.
Bàu 4
26 Apaq yòng pagàu ca'naih dòih thai ca cabô,
hadai paq kìq jàiq thai ca mangai 'noiq.
27 Tàng ìh ùh i cleq ca'naih,
wì jah yŏc da ìh jùang cùi 'mòh?
Bàu 5
28 Apaq dŏt 'nhac 'bài long cŏc,
ma boc yaq ìh khoi tàp đòiq.
Bàu 6
29 Ìh i hnoq mangai leq panim ca abroq bìac haq ùh?
Mangai aih jah yòng ŏi jang ngìa 'bài bùa,
ùh xài yòng jang ngìa mangai hamoq.