14
Bìac Blùng wa Bìac Dù da Con Mangai
Đawit Achìh
1 Mangai blùng hèm ta manoh, doi:
“Ùh i ca Boc Plình.”
Wì haq mangai amùa amach; wì haq khoi broq bìac amùa wa 'mèq 'mac;
ta wì haq ùh i mangai leq broq bìac lem.
2 Chuaq ŏi ta plình ngan con mangai,
ngan thù i mangai leq i manoh loq 'nì;
i mangai leq loq chaq Boc Plình ùh?
3 Wì dìq dŏng khoi lac trong.
Dìq wì haq khoi loh ca 'mèq 'mac;
ùh i mangai leq broq lem, chaq mòiq ngai xôq ùh hnoq.
4 Wì mangai dù aih dìq ùh 'nì loq 'mòh?
Wì toq enh caq jàn da au tìah ca caq 'benh;
wì haq ùh waiq dang Chuaq.
5 Ngan tau, bìac yùq crè khoi gùp wì haq,
ma jah 'màng aih Boc Plình ŏi pah 'nhòng mangai ta-atoq.
6 Pì raliang đac bìac broq da mangai nan xa,
mahaq Chuaq raq nòi hanình da wì haq.
7 Ôi joq ngèh enh bìac dèch claih Is-ra-ên enh wang Siôn khoi jah trùh.
Jò Chuaq khoi ahlài dèh jàn da haq enh nòi broq hapŏng khoi jah hlài,
Jacôp jah lem bùi; Is-ra-ên jah lem bùi.