29
Bàu Da Boc Plình
Đawit Achìh
1 Ôi con caiq da Chuaq, dèch am ca Chuaq beq,
dèch am ca Chuaq can 'ngah 'ngai wa cwìang itai Haq.
2 Phai dèch am ca Chuaq can 'ngah 'ngai ma tajì ca hiniq Haq beq.
Cùh waiq Chuaq ta nòi lem lình hadròih Haq.
3 Bàu da Chuaq catròn jàp ca cròng diac;
Boc Plình da can 'ngah 'ngai
wa cwìang itai cađah dêh yi hnao ca diac raxìq rŏng.
4 Bàu Chuaq dìq jaq dêh;
bàu Chuaq dìq jaq rahù.
5 Bàu da Chuaq tagoh ca long hùang nam,
Chuaq broq tagoh ca long hùang nam ŏi Liban.
6 Chuaq broq ca Liban plôh tìah ca 'bo con,
wa Si-ri-ôn plôh tìah ca 'bo brì.
7 Bàu da Chuaq plôh loh pla ùnh.
8 Bàu da Chuaq broq tadroq ca đùng wang wê;
Chuaq broq tadroq ca đùng wang wê ta Cađê.
9 Bàu da Chuaq broq ca jŏi can jah xêh;
Bàu da Chuaq broq dìq ca long ta rôm 'bìq clìh dŏng hla;
Ta hnem cùh waiq da Haq rìm ngai cachech doi: “ 'Ngah 'ngai!”
10 Chuaq wèq cwìang enh 'nhèq ca diac càn.
Chuaq broq Bùa hloi hloi.
11 Chuaq jah am padren ca con jàn da Haq!
Chuaq jah 'noh xôq ramŏt am can catèm ca wì.