32
Xôq Ramŏt Taiq Jah Baxŏng Tôiq
Đawit Achìh
1 Xôq ramŏt ca mangai leq khoi broq ùh troq mahaq jah baxŏng tôiq,
wa tôiq lôi haq jah glàp đac.
2 Xôq ramŏt ca mangai leq,
Chuaq ùh ta'mòq tôiq ca haq,
wa manoh haq jah pi i ca bìac amòng 'nùt.
3 Jò 'nhòq jah pa'noh dèh tôiq lôi,
chac au loh ca hùt tagah taiq au hràng xèq ca hì.
4 Ma jah 'màng aih dahì damang,
tì Ìh hmet enh 'nhèq ca au,
padren au loh ca croh crenh tìah ca diac ngom
jò glàm mat mahì tôq dêh.
5 Au khoi pa'noh dèh tôiq enh ngìa ca Ìh,
ùh cadoc cleq.
Au doi: “Au jah pa'noh dèh rìm
bìac broq ùh troq enh ngìa ca Chuaq.”
Ìh khoi baxŏng đac
tôiq ngang dù da au.
6 Ma jah 'màng aih dìq ca mangai ma loq yùq crè ca Chuaq waiq khàn
ca Haq beq jò ŏi raq jah glàm Haq,
đòiq ca jò i bìac ranàc tìah ca diac càn trùh,
èh xôq ùh hìaq trùh ca wì haq.
7 Ìh nòi au hanình.
Ìh wèq ban au claih ca bìac 'mèq ranàc.
Ìh yŏc bàu calêu dèch claih pa'noh dudan ca au.
8 Chuaq doi: “Au jah hnài ìh, patô trong lam ca ìh;
mat Au rai ngan wèq, hacùng Au rai hnài tanap ca ìh.”
9 Apaq ùh loq tàng tìah ca axêh,
tìah ca axêh la,
ep yŏc khàp wa caxi wèq đòiq pagàt haq, tàng ùh,
haq ùh trùh haten ca ìh.
10 Mangai dù jah glàm nan xa bàc,
mahaq mangai loq yùq crè ca Chuaq,
can xa-ŏch xam manoh loq waq da Haq dudan ca mangai aih.
11 Ôi mangai rìh ta-atoq, phai lem bùi ta Chuaq beq;
yŏc manoh cachech bàu lem bùi ta Haq beq.