40
Boc Plình Wèq Ban Mangai Patìh
Đawit Achìh
1 Au chìuq àt ran gòm Chuaq,
Haq cachình don tamàng bàu dang creo da au,
2 Chuaq khoi dèch au jah claih enh hàm dìq jaq ramòt,
loh khoi ca nòi jrùq,
pa'nàng au enh crŏng hmu càn,
am ca au nòi cajap đòiq jènh au jah yòng cajap.
3 Chuaq am ca hacùng au jah calêu 'bŏi calêu ma neo,
calêu hadròih padèch hiniq Boc Plình da bèn;
bàc ngai jah hnoq,
èh jah yùq crè wa jah canòm ca Chuaq.
4 Xôq ramŏt ca mangai
leq đòiq dèh manoh lùi canòm nòi Chuaq,
ùh canòm ca bìac loq catèh da con mangai,
hadai ùh tawìh tiaq trong amòng.
5 Chuaq ôi, Ìh Boc Plình da au,
Ìh khoi broq bàc bìac cwìang itai,
wa Ìh khoi hèm bàc ca nhèn;
ùh i mangai leq nui rèn bìac aih,
ùh i cabô jah achùa ca Chuaq,
6 Ìh ùh ngèh enh ca ngè tadreo wa ngè xam 'mau mì.
Ìh khoi pèh don ca au.
Ìh ùh enh ca ngè tadreo bùh
wa ngè dèch am rŏt hlài enh tôiq lôi.
7 Èh au doi: “Cô, au khoi trùh,
ta sech khoi i achìh trùh au.
8 Boc Plình da au ôi! Au bùi dìq jaq jah broq tiaq manoh Ìh,
ranenh da Chuaq ŏi ta manoh au.”
9 Au khoi anoi hlài bìac bùi lem wa trong ta-atoq ta tagop càn,
hacùng au ùh jah ca'nhìp.
Chuaq ôi, Ìh khoi loq bìac aih.
10 Au ùh cadoc bìac ta-atoq da Ìh ta manoh au.
Au khoi anoi 'noh bìac ta-atoq wa bìac dèch claih da Chuaq.
Au ùh cadoc can xa-ŏch xam manoh loq waq
wa bàu joq 'nàng da ìh ta tagop hadròih càn.
11 Chuaq ôi! Xìn Ìh paq clenh manoh loq waq ca au,
can xa-ŏch xam manoh loq waq wa bàu joq 'nàng da Chuaq jah wèq ban au hloi hloi.
12 Ma jah 'màng aih bìac ranàc bàc hrìn tap dudan ca au,
tôiq lôi au khoi lom au bàc hrìn rèn ùh dìq,
yi bàc ca xàc ta gàu au;
manoh tanuq da au khoi hù hnhung đac.
13 Chuaq ôi! Xìn Ìh bùi manoh dèch au.
Chuaq ôi xìn trùh ma renh jùp đò au.
14 Waiq xìn jah broq dìq ca wì ma chaq jêh au,
loh ca camaih wa loh ca manhài.
Waiq xìn wì ma enh raliang đac
au tawìh hlài rai camaih.
15 Waiq xìn wì ma doi ca au: “Ha ha!”
jah 'bìq yùq crè taiq manoh camaih ca dađeh.
16 Mahaq waiq mangai ma chaq Chuaq jah lem bùi manè ŏi ta Chuaq.
Waiq 'bài mangai ma tamèt bìac dèch claih da Chuaq,
jah doi hloi hloi:
“Chuaq, Haq joq 'nàng đang ca jah 'ngah 'ngai padèch ha'nhèq.”
17 Au cô, taiq au pa wa nan tùng,
waiq xìn Chuaq hèm trùh ca au.
Chuaq, Ìh jùp đò wa dèch claih au;
waiq Boc Plình xìn Ìh paq xòi trùh.