55
Bàu Waiq Xìn Raliang Đac Mangai Ngang Dù
Đawit Achìh
1 Chuaq ôi! Xìn halang don tamàng bàu waiq khàn da au,
paq wia hangai ùh tamàng bàu waiq khàn da au.
2 Xìn tamàng wa tèo hlài bàu waiq dang da au,
ma jah 'màng aih ŏi ta bìac mamùc,
au hlè lèt wa dìq jaq manhài manhèp.
3 Taiq bàu cachech da mangai ma tagit ca au,
taiq bìac padit padiang da mangai dù,
wì haq tam bìac nan xa ca au,
broq ca au loh ca manhài,
wa xam manoh nòih wì haq tajraq hlài ca au.
4 Manoh au dìq jaq xa,
bìac yùq crè da can cachìt khoi clìh enh 'nhèq ca au.
5 Au yùq crè wa tarìt,
bìac hidròt khoi padit làp ca au.
6 Au hèm: “Ùac aiq au i panan da chìm trù,
au jah pan hangai hi ŏi nòi catèm.
7 Au jah lam hangai
wa jah mùt ŏi ta đùng wang wê.
8 Au dahôiq lam mùt ta nòi hanình
đòiq claih ca bahùt càn.”
9 Chuaq ôi! Xìn ìh broq manhài đac bàu capoch da wì haq,
ma jah 'màng au hnoq bìac talech tacai wa bìac jêh cađac ta phôq.
10 Dahì damang wì haq lam dudan ti 'nhèq panàt phôq;
bìac ngang dù wa 'mèq 'mac ŏi ta phôq.
11 Bìac raliang piang hadai ŏi ta aih;
bìac padit padiang wa bìac 'nùt ŏi hloi hloi ta gùng aih.
12 Ma jah 'màng aih, ùh xài mangai tagit ca au jù lê au.
Tàng i 'màng aih au nui chìuq àt;
hadai ùh xài mangai ma git ca au loq padèch dađeh tajraq hlài ca au.
Tàng 'màng aih au jah chaq trong amot khoi ca haq.
13 Mahaq ìh raq mangai da-adàng ca au,
bua au pajùm manoh ti au.
14 Ma hloi hloi hatùang lem bùi ti dabau,
pajùm ti dabau bàc ngai mùt hnem Boc Plình;
15 Waiq xìn can cachìt ta'ngàc trùh ti wì haq,
thê wì haq loh ta nòi ralùng hanang jò wì haq xôq ŏi raq rìh,
ma jah 'màng aih taiq bìac ngang dù ŏi ta hnem wa ta manoh wì haq.
16 Mahaq phàn da au, au jah creo dang ca Chuaq,
èh Chuaq jah dèch claih au.
17 Daxroq, dahì, daxèq au creo dang,
hràng rayoih ca Chuaq,
èh Haq tamàng bàu au.
18 Haq dèch mahua yiang au mùt catèm,
khoi enh nòi tajêh poh,
ma jah 'màng aih bàc ngai 'nang tajraq hlài ca au,
19 Boc Plình Haq ma khoi ha'ngui gèq bùa wèq hloi enh calah,
Haq tamàng au wa tajraq hlài ca wì haq;
mangai aih ùh cađac trong dù dađeh
wa ùh loq yùq crè ca Boc Plình.
20 Phàn da bua au, haq dèch tì tajraq hlài ca mangai hatroq ca haq,
wa loq blàq blènh dèh bàu pachac.
21 Bàu capoch da haq lia bu dàng ramaq 'bo,
mahaq manoh haq toq chaq trong tajêh poh.
Bàu haq tabat tìah ca dàu,
mahaq manoh tìah ca chang khoi dŏih enh hnup.
22 Phai 'noh am bìac genh trap ìh ca Chuaq beq,
Haq jah dèch ìh;
Haq ùh jò leq
đòiq mangai ta-atoq loq tadroq manoh.
23 Mahaq Chuaq ôi,
xìn Ìh hwenh đac mangai jêh mangai
wa mangai ngang dù loh ta ham jrùq,
đòiq wì haq ùh jah rìh dìq dèh ca'nhòng rìh da wì haq.
Mahaq au hloi hloi canòm ca Chuaq da au.