57
Bàu Waiq Xìn Chuaq Dèch Claih
Đawit Achìh
1 Boc Plình da au ôi! Xìn Ìh xa-ŏch ca au, xìn Ìh xa-ŏch tamèt ca au,
ma jah 'màng aih mahua yiang au mùt hanình ca Ìh.
Au jah mùt enh 'neq 'mù panan da Ìh đòiq jah hanình trùh
jò can ranàc càn lam cwa.
2 Au jah waiq dang Boc Plình Ma Yi Ha'nhèq da au,
aih Boc Plình jah broq gêh rìm hiniq am ca au.
3 Enh plình Haq jah am xôq ramŏt đòiq dèch claih au.
Haq lech ca mangai loq padit padiang au.
Boc Plình jah am can xa-ŏch xam manoh loq waq wa bàu joq 'nàng da Haq.
4 Mahua yiang au ŏi ta'ne baco hlari,
cla au phai ca'nùng ti ngè loq hlôi loh pla ùnh;
aih con mangai hanenh wì haq tìah ca jaoq wa rang;
rapet wì haq tìah ca chang gùm hin.
5 Waiq Boc Plình da au, xìn hiniq Ìh jah padèch yi hnao ca lòp plình,
wa can 'ngah 'ngai da Ìh jah loh jàp crŏng taneh.
6 Wì tang hlàm ca jènh au;
mahua yiang au loh ca hŏnh.
Wì chìa hàm enh ngìa ca au,
mahaq cla wì raq clìh trom aih.
7 Ôi Boc Plình da au,
manoh au cajap;
au jah calêu wa padèch hiniq Ìh.
8 Ôi mahua yiang da au,
rìu beq; ôi broc, ôi cràu, rìu beq;
au jah padrìu daxroq rìu.
9 Chuaq ôi, au jah manè pôi Ìh ta'ne jàn;
au jah calêu padèch hiniq Ìh ta'ne 'bài Diac.
10 Ma jah 'màng aih can xa-ŏch xam manoh loq waq da Ìh yi càn ca rìm lòp plình,
wa bàu joq 'nàng da Ìh yi ha'nhèq ca yùc.
11 Waiq Boc Plình da au, xìn hiniq Ìh jah padèch ha'nhèq yi hnao ca lòp plình,
can 'ngah 'ngai da Ìh ha'nhèq yi hnao jàp crŏng taneh.