59
Bàu Waiq Khàn Xìn Dèch Khoi Mangai Tagit
Đawit Achìh
Waiq Boc Plình da au ôi! Xìn dèch au claih ca mangai ma tagit ca au;
xìn wèq ban au khoi ca mangai enh tajraq hlài ca au.
Xìn dèch au claih ca mangai ngang dù;
xìn dèch au claih ca mangai broq ta-ùc ca mahem.
 
Ma jah 'màng aih ngan cô!
Chuaq ôi, wì achop chaq trong jêh đac au;
mangai ngang dù pajùm ti dabau tajraq hlài ca au,
ùh xài taiq au khoi broq tôiq hadai ùh xài taiq lôi da au.
Au ùh broq tôiq lôi cleq ca wì, mahaq xôq wì glàm trùh đòiq jêh au.
Chuaq ôi, yòng beq đòiq hnoq wa wiang ti au.
Ìh raq Chuaq, Ìh raq Boc Plình, Chuaq ma wèq dìq ca 'bình plình, Boc Plình da Is-ra-ên.
Xìn Chuaq yòng đòiq baxa ca rìm Diac;
xìn apaq xa-ŏch ca mangai leq loq blàq blènh wa broq tôiq.
 
Damang, wì haq wìh hlài,
grenh tìah ca coq wa lam dudan ca phôq.
Ngan cô, hacùng wì haq hloh toq bàu waiq hanip,
blìa hacùng wì haq bu dàng chang gùm,
ma jah 'màng aih wì haq hèm: “Ùh i cabô tàng.”
Mahaq Chuaq ôi! Ìh jah do ca wì haq,
Ìh jah halê ca rìm Diac.
 
Ô Chuaq padren da au, au jah ngèh gòm Ìh,
ma jah 'màng aih Ìh wìa đôn hanình da au.
 
10 Boc Plình nhò can xa-ŏch xam manoh loq waq da Haq jah trùh đòiq jùp đò au;
Haq jah am ca au manoh ngan hnoq bìac ta'blêq ca mangai tagit ca au.
11 Ôi Chuaq! Ìh joq 'nàng khìan da au, xìn apaq jêh hloi wì haq,
èh yùq jàn da Ìh loq hèt bàu hnài da Ìh,
mahaq yŏc cwìang itai da Ìh paha'neq wì,
èh broq ca wì haq pac lac beq.
12 Ma jah 'màng aih tôiq ngang dù enh hacùng wì haq,
aih bàu waiq hanip wa amòng enh hacùng wì haq capoch 'noh,
waiq xìn wì haq hlech dèh bìac loq padèch dađeh da wì haq.
13 Xam can nòih da Ìh,
xìn jêh đac wì haq;
xìn jêh đac hloi wì haq dìq dŏng đòiq wì haq jah loq Boc Plình
wèq cwìang jàn Jacôp wa dìq ca crŏng taneh.
 
14 Damang, wì haq wìh hlài,
ngrè tìah ca coq
wa lam dudan ca phôq.
15 Wì haq lam ba'yàt đòiq chaq caq,
èh mamùc mamac tàng ùh panàc.
16 Phàn da au,
au jah calêu padèch cwìang itai da Chuaq;
rìm xroq au calêu padèch can xa-ŏch xam manoh loq waq da Chuaq,
ma jah 'màng aih Ìh đôn hanình wa pagia lì da au jò glàm bìac xalep.
 
17 Ôi Chuaq padren dêh da au, au calêu padèch Ìh,
ma jah 'màng aih Ìh đôn hanình da au,
Boc Plình ma patô can xa-ŏch xam manoh loq waq ca au.