63
Mahua Yiang Au Croh ca Chuaq
Đawit Achìh
1 Waiq Chuaq, Ìh joq 'nàng Boc Plình da au,
bu 'ngah au khoi ti chaq Ìh;
mahua yiang au dìq jaq ngèh enh ca Chuaq;
mahua yiang au croh ca Chuaq,
tìah ca nòi wia taneh croh crenh, xalep,
ùh i ca diac chac hamac au ngèh enh Ìh.
2 'Màng aih, au khoi ngan hnoq Ìh ta hnem tagop Hadròih,
đòiq jah ngan can 'ngah 'ngai wa cwìang itai da Chuaq.
3 Ma jah 'màng aih can xa-ŏch xam manoh loq waq da Chuaq,
lem yi hnao ca can rìh, hacùng au jah calêu padèch hiniq Chuaq.
4 'Màng aih au jah calêu padèch hiniq Chuaq lùch ca'nhòng au,
au jah dèch tì waiq khàn canòm ca hiniq Chuaq
5 Mahua yiang au jah caq panàc tìah ca caq ngot caxènh wa caq ramaq;
hacùng au jah lem bùi calêu padèch hiniq Chuaq.
6 Jò ca'nùng ta jùang, au xôq hmàng trùh ca Chuaq;
au hèm haboq ca Haq trùh jrùq mang,
7 ma jah 'màng aih, Chuaq khoi jùp đò au,
enh 'neq ca yàp panan da Chuaq, au jah calêu lem bùi.
8 Mahua yiang au rùp cajap ca Ìh,
tì pah 'ma Chuaq jah dèch au.
9 Mahaq mangai leq chaq trong đòiq tajêh au,
èh jah clìh ta nòi jrùq da taneh.
10 Jah jao am wì haq ca chang gùm,
broq hanùm ca chôn.
11 Mahaq bùa jah lem bùi ŏi ta Boc Plình.
Dìq ca mangai leq canòm ca hiniq Haq đòiq pachac, èh jah lem bùi,
ma jah 'màng aih Chuaq jah broq ca hacùng mangai amòng loh ca làu.