66
Bàu Manè Boc Plình Taiq Haq Tàng Bàu Waiq Khàn
1 Dìq ca crŏng taneh ôi! Dèch bàu dêh calêu manè ca Boc Plình beq.
2 Calêu manè bìac 'ngah 'ngai da hiniq Haq,
calêu manè wa padèch hiniq Haq.
3 Doi ca Chuaq: “Bìac broq da Ìh joq đang
ca yùq crè taiq cwìang itai càn caiq da Ìh;
'bài mangai enh tajraq ca Ìh, dìq ca wì yùq crè ŏi enh 'neq ca Ìh.
4 Dìq ca crŏng taneh cùh waiq Ìh,
calêu padèch Ìh
wa calêu padèch hiniq Ìh.”
5 Trùh beq hi ngan bìac broq da Boc Plình,
bìac broq da Haq ca con mangai joq đang ca yùq crè.
6 Haq broq diac raxìq wìa nòi taneh croh;
wì lam jènh cwa diac cròng tìah ca lam ta nòi taneh go,
taiq 'màng aih bèn jah lem bùi ŏi ta Haq.
7 Chuaq wèq cwìang hloi hloi xam cwìang itai haq,
mat Haq ngan hlài rìm bìac broq da rìm diac;
ôi pì mangai loq tajraq hlài, apaq padèch dađeh.
8 Ôi rìm jàn, calêu padèch hiniq Boc Plình da bèn beq,
broq ca bàu calêu padèch hiniq Chuaq jah lam rìm nòi.
9 Haq khoi wèq ban mahua yiang bèn,
ùh đòiq ca jènh bèn lia cro.
10 Boc Plình ôi! Ma jah 'màng aih, Ìh khoi thù nhèn,
Ìh khoi ram nhèn tìah ca ram 'bac.
11 Ìh khoi 'mùt nhèn ta hlàm
wa đòiq can trap ta crŏng nhèn.
12 Ìh thê mangai broq gàu wèq nhèn,
nhèn ep lam cwa ùnh,
cwa diac, mahaq Ìh khoi 'ràng nhèn trùh nòi padrŏng can.
13 Au jah 'ràng ngè tadreo bùh mùt ta hnem Chuaq,
wèq dèh bàu pachac da au ca Ìh;
14 Aih bàu pachac hacùng
au khoi capoch 'noh jò nan xa.
15 Au jah dèch am ngè aban khoi bech xam hòi xua thùm da trìu calô;
au dèch am ca Ìh ngè tadreo bùh xam 'bo calô wa bubi calô.
16 Ôi dìq ca mangai ma loq yùq crè ca Boc Plình, trùh beq đòiq hi tamàng,
èh au jah anoi hlài bìac Chuaq khoi broq ca mahua yiang au.
17 Hacùng au khoi creo dang Chuaq,
rapet au khoi padèch Haq.
18 Tàng au wèq bìac dù ta manoh,
joq 'nàng Chuaq ùh tamàng bàu au.
19 Mahaq joq 'nàng, Boc Plình khoi tamàng,
Haq khoi tamàng bàu waiq khàn da au.
20 Joq đang ca padèch hiniq Boc Plình,
ma jah 'màng aih, Haq ùh cađac bàu waiq khàn da au,
hadai ùh cađac can xa-ŏch xam manoh loq waq khoi ca au.