76
Boc Plình Da Jacôp Jah Ta'blêq
Asap Achìh
1 Ta Juđa wì dìq loq ca Boc Plình ro rang,
hiniq Haq dìq jaq càn caiq ta Is-ra-ên.
2 Hnem traiq cùh waiq da Haq ŏi ta Salem;
nòi Haq ŏi, aih Jê-ru-sa-lem.
3 Ta aih Chuaq jah goh đac rang panenh xam ùnh,
khìan, chang gùm, wa ranac da tajêh poh.
4 Ìh 'ngah 'ngai,
rahù dìq jaq yi hnao ca wang i hloi hloi.
5 'Bài mangai tanuq khoi 'bìq ta'blêq;
wì haq jah cùi dìq jaq hnia;
ùh i mòiq ngai dêh leq nui dèch dèh tì cla.
6 Ô Boc Plình da Jacôp, jò Ìh lech,
axêh wa xê axêh dìq cro cachìt.
7 Chuaq ôi, Ìh raq joq đang ca yùq crè!
Cabô leq nui yòng enh ngìa ca Ìh jò Ìh loh nòih?
8 Enh plình ha'nhèq, Ìh 'noh bàu hadrah;
taneh tarìt crè wa ŏi hatenh,
9 jò Boc Plình yòng hadrah,
đòiq dèch dìq ca mangai ma loq paha'neq dađeh ta crŏng taneh.
10 Joq 'nàng 'màng aih, can nòih da con mangai xôq jah am ca Ìh 'ngah 'ngai;
rah can nòih aih Chuaq jah padràng đòiq.
11 Pachac beq wa broq gêh dèh bàu pachac enh ngìa ca Chuaq, Boc Plình da pì.
Ôi rìm jàn, dèch am ca Boc Plình ma đang ca yùq crè beq.
12 Chuaq jah dŏih đac can loq catèh da mangai wèq cwìang,
broq dìq ca bùa crŏng taneh yùq crè ca Haq.