86
Đawit Waiq Khàn
Đawit Achìh
1 Waiq Chuaq xìn cachình don đòiq tamàng wa tèo hlài bàu da au,
ma jah 'màng aih au chìuq nan xa wa khoi thìuq bàc bìac.
2 Xìn wèq ban can rìh au, ma jah 'màng aih au mangai hadròih;
Ìh Boc Plình da au, au lùi canòm ca Ìh, xìn dŏih dèch hapŏng Ìh.
3 Waiq Chuaq xìn xa-ŏch ca au ma jah 'màng aih au creo
dang ca Ìh xèq ca hì.
4 Xìn am ca manoh hapŏng Ìh jah lem bùi,
ma jah 'màng aih Chuaq ôi,
mahua yiang au ngèh enh Ìh.
5 Chuaq ôi! Ìh lem lình wa i manoh loq baxŏng tôiq,
wa bình halùih can xa-ŏch xam manoh loq waq
am ca mangai leq loq creo dang ca Ìh.
6 Waiq Chuaq, xìn halang don tamàng bàu waiq khàn da au,
wa bàu creo dang da au.
7 Ta hì nan xa, au creo dang ca Ìh ma jah 'màng aih
Ìh tèo bàu au.
8 Chuaq ôi! ùh i ca yiang leq tìah ca Ìh;
hadai ùh i ca bìac broq leq tìah ca bìac broq da Ìh.
9 Chuaq ôi! rìm Diac ma Ìh khoi broq loh,
jah trùh đòiq hacùn cràng cùh waiq enh ngìa ca Ìh,
wa jah calêu padèch hiniq Ìh.
10 Ma jah 'màng aih Chuaq dìq jaq càn caiq wa broq rìm bìac halac càn,
toq Ìh raq joq Boc Plình.
11 Chuaq ôi, xìn hnài au loq ca trong lam da Ìh;
au jah lam tiaq trong da bàu joq 'nàng troq da Ìh,
xìn am ca au mòiq manoh ca Ìh,
manoh loq yùq crè ca hiniq Ìh.
12 Waiq Chuaq, Boc Plình da au, au dìq ca manoh manè pôi Ìh,
au hloi hloi calêu padèch hiniq Ìh.
13 Ma jah 'màng aih taiq can xa-ŏch xam manoh loq waq càn caiq ma Chuaq khoi am ca au,
Chuaq khoi dŏih dèch au enh nòi ralùng jrùq.
14 Ô Boc Plình, 'bài mangai loq catèh yòng đòiq tajraq hlài ca au:
wì mangai ngang dù chaq trong đòiq jêh cachìt au,
taiq wì haq ùh loq yùq crè ca Ìh.
15 Mahaq Chuaq ôi, toq Ìh raq Boc Plình loq xa-ŏch wa loq am dech,
xòi ca loq nòih, bình halùih can xa-ŏch xam manoh loq waq wa bàu joq 'nàng.
16 Xìn Chuaq ngan hnoq wa xa-ŏch tamèt ca au,
xìn am can tadêh Ìh ca hapŏng da Ìh,
xìn wiang ti con calô da hapŏng cadrì Ìh.
17 Xìn Chuaq am mòiq teo patô ca au, Ìh khoi am xôq ca au,
đòiq wì ma git ca au ngan hnoq wa camaih.
Ma jah 'màng aih waiq Chuaq,
Ìh raq khoi jùp đò wa alòng au.