132
Waiq Xìn Chuaq Am Xôq Ramŏt ca Nòi Hadròih
1 Chuaq ôi! Xìn hmàng hlài ca Đawit
wa dìq bìac nan xa haq ep chìuq.
2 'Màng leq haq pachac ca Chuaq,
wa pachac ca Chuaq I Cwìang Itai da Jacôp.
3 Joq 'nàng au ùh mùt dèh ta traiq,
ùh tŏc ta jùang ca'nùng au;
4 Au ùh am dèh mat cùi,
hadai ùh am dèh mat ca'nhip,
5 trùh jò leq au chaq jah mòiq nòi ca Chuaq,
mòiq nòi ŏi ca Chuaq I Cwìang Itai da Jacôp.
6 Cô, nhèn i tàng anoi bìac hom wêh jao ŏi ta Ep-ra-ta,
wa chaq hnoq hom aih ta đùng tamang Ja-a.
7 “Nhèn jah mùt jang nòi Ìh ŏi;
cùh waiq enh 'neq ca long thòt roh jènh Ìh.
8 ‘Ôi Chuaq, xìn renh mùt nòi padài da Ìh
ti hom wêh jao da cwìang itai Ìh!
9 Waiq ca 'bài pajàu da Chuaq jah caxùnh bìac ta-atoq,
'bài mangai Ìh jah calêu lem bùi.’ ”
10 Taiq Đawit, hapŏng Chuaq, xìn paq cađac haq,
mangai jah xùt dàu da Ìh.
11 Chuaq khoi pachac ca Đawit,
ùh blàq bàu, doi 'màng cô:
“Au jah 'nac đòiq ta gèq ìh
mòiq ngai con ìh xa-ông loh.
12 Tàng con caiq ìh wèq wêh jao Au,
wa bàu hnài ma Au hnài wì haq,
èh con caiq
wì haq jah ha'ngui ta gèq ìh trùh hloi hloi.
13 “Taiq Chuaq khoi ràih Jê-ru-sa-lem;
Haq loq enh Jê-ru-sa-lem broq nòi ŏi da Haq;
14 cô nòi Au padài hloi hloi;
Au jah ŏi ta cô, taiq Au i ngèh enh 'màng aih.
15 Au jah am xôq ramŏt dahwèq caq ca Jê-ru-sa-lem jah tàu tìa,
ca 'bài mangai pa da phôq aih jah caq 'benh panàc,
16 Au hadai caxùnh am ca pajàu phôq aih bìac dèch claih,
wa 'bài mangai hadròih phôq aih jah calêu bàu dêh lem bùi.
17 “Ta aih Au broq ca aki da Đawit plôh ramŏt;
Au khoi padon đen ca haq ma Au xùt dàu.
18 Au yŏc can camaih caxùnh ca mangai ma tagit ca haq;
mahaq cadoh ta gàu haq jah 'ngah 'ngai.”