138
Manè Pôi Chuaq Taiq Can Loq Waq wa Bìac Joq 'Nàng Da Haq Thò Đawit Broq
Đawit Achìh
1 Au dìq ca manoh manè pôi Chuaq,
calêu padèch Chuaq jang ngìa 'bài can kiac.
2 Au jah cùp gàu ngìa pah hnem cùh waiq da Ìh
wa manè pôi hiniq Chuaq
taiq can xa-ŏch xam manoh loq waq wa bàu joq 'nàng da Chuaq;
Ìh khoi broq hiniq wa bàu joq 'nàng da Ìh jah padèch ha'nhèq
yi hnao ca rìm bìac.
3 Ta hì au creo dang Ìh, Ìh tèo bàu au,
parông manoh au jah dêh.
4 Ôi Chuaq, 'bài bùa crŏng taneh jah manè pôi Ìh,
taiq wì haq khoi tàng bàu da hacùng Ìh.
5 Wì haq jah calêu ca trong da Ìh,
taiq 'ngah 'ngai Chuaq aih càn caiq.
6 'Nhac ca Chuaq ŏi ha'nhèq, Haq xôq ngan trùh 'bài mangai ùh nèn;
mahaq 'bài mangai loq catèh, Haq canao loq enh hangai.
7 'Nhac ca au lam ta'ne bìac xa,
Ìh jah broq ca au jah rìh
wa dèch tì tajraq hlài ca can xrông da mangai ma tagit ca au,
wa tì pah 'ma da Ìh jah dèch au.
8 Chuaq jah broq gêh bìac da au.
Ôi Chuaq, can xa-ŏch xam manoh loq waq Ìh ŏi i hloi hloi;
xìn paq cađac bìac broq da tì Ìh.