143
Mangai Achìh Waiq Chuaq Dèch Đòiq Claih ca Mangai Ma Ta'blêq
Đawit Achìh
1 Ôi Chuaq, xìn tamàng bàu au waiq khàn,
halang don tamàng bìac au waiq xìn;
Tiaq bìac wèq dèh bàu wa can ta-atoq da Ìh,
xìn tèo bàu au;
2 Xìn paq hadrah mangai hapŏng Ìh;
taiq jang ngìa Ìh ùh i mangai leq ta-atoq.
3 Taiq mangai tagit khoi padit padiang mahua yiang au,
jôiq nunit đac can rìh au ta taneh;
broq ca au ep ŏi nòi clam clôiq,
ùh crài cleq ca mangai cachìt khoi dùnh.
4 Taiq 'màng aih, mahua yiang au tagah lep,
manoh au yùq crè dìq jaq.
5 Au hmàng hlài 'bài hì calah nèh,
hèm trùh rìm bìac Ìh khoi broq,
wa haboq hèm bìac broq da tì Ìh.
6 Au dèch tì ngìa ta Ìh;
mahua yiang au ngèh ca Ìh tìah ca taneh croh ngèh enh diac.
7 Chuaq ôi! Xìn renh rùp bàu au!
Mahua yiang au loq hŏnh.
Xìn Chuaq paq cadoc hadrò Ìh ca au,
èh yùq au tìah ca mangai loh ta ralùng jrùq.
8 Bu xrŏih xroq, xìn am ca au jah hnoq can xa-ŏch xam manoh loq waq da Ìh,
taiq au đòiq dèh manoh canòm Ìh;
xìn patô am ca au loq trong khòh lam,
taiq mahua yiang au ngèh gòm Ìh.
9 Ôi Chuaq, xìn dŏih au claih ca mangai tagit;
au hanình ca Ìh.
10 Xìn hnài au broq tiaq manoh enh Ìh,
taiq Ìh Boc Plình da au;
waiq Yiang lem lình da Ìh
'nong au mùt ta nòi taneh tamang.
11 Ôi Chuaq, canòm ca hiniq Ìh, xìn tam padren ca au;
nhò bìac ta-atoq Ìh, xìn dèch mahua yiang au claih ca can nan xa cô.
12 Nhò can xa-ŏch xam manoh loq waq Ìh,
xìn jêh đac dìq mangai tagit ca au,
wa raliang đac 'bài mangai ma jùq jàm au, taiq au mangai hapŏng Ìh.