145
Manè Padèch Chuaq Taiq Bìac Loq Waq wa Cwìang Itai Haq
Đawit Achìh
1 Ôi Bùa au Ìh Boc Plình au, au dèch bàu manè pôi Ìh,
manè padèch hiniq Ìh trùh hloi hloi ùh hêq.
2 Rìm hì au jah dèch bàu manè pôi Ìh,
au jah calêu padèch hiniq Chuaq trùh hloi hloi ùh hêq.
3 Chuaq dìq jaq càn đang ca padèch;
can ha'nhèq Haq ùh nui jah wêh.
4 'Nhòng cô cwa 'nhòng tau jah anoi hlài wa ca padèch bìac Ìh,
wa anoi hlài cwìang itai da Ìh.
5 Au jah hèm haboq ca bìac padèch rahù 'ngah 'ngai da Ìh,
wa bìac halac da Ìh.
6 Wì jah anoi 'noh cwìang itai da bìac đang ca crè da Ìh,
mahaq au jah anoi 'noh bìac càn caiq da Ìh.
7 Wì jah anoi 'noh wa bahmàng hlài can lem lình càn da Ìh,
wa calêu dêh bìac ta-atoq da Ìh.
8 Chuaq am xôq wa i manoh xa-ŏch, xòi nòih,
wa bình halùih can xa-ŏch xam manoh loq waq.
9 Chuaq broq lem am ca rìm ngai,
can loq xa-ŏch Ìh ŏi ti rìm bìac Ìh ma broq loh.
10 Ôi Chuaq, bìac Ìh ma broq loh calêu manè Ìh;
'bài mangai hadròih Ìh hadai dèch bàu manè pôi Ìh.
11 Wì anoi hlài bìac 'ngah 'ngai Diac Ìh,
anoi hlài cwìang itai da Ìh.
12 Đòiq pa'noh ca con mangai loq cwìang itai da Ìh,
wa can 'ngah 'ngai rahù da Diac Ìh.
13 Diac Ìh aih Diac i hloi hloi;
cwìang wèq da Ìh ŏi trùh hloi bình ngŏng 'nhòng.
14 Chuaq jùp đò dìq rìm ngai tacro,
wa bahnhuh hlài rìm ngai cùp gàu.
15 Mat da rìm ngè bìac dìq ngèh gòm Ìh;
Ìh am ca wì haq dahwèq caq troq jò.
16 Chuaq hlìa 'noh tì,
broq panàc tôm tàu ca rìm ngè rìh.
17 Chuaq ta-atoq ta rìm trong Haq,
wa am xôq ta rìm bìac Haq.
18 Chuaq ŏi haten ca rìm mangai waiq dang Haq.
Haq ŏi haten ca mangai i manoh joq 'nàng waiq dang Haq.
19 Haq 'noh tôm tàu ca rìm ngai ngèh enh, aih mangai loq crè ca Haq;
Haq hadai tamàng bàu creo dang da wì haq, wa dŏih claih wì haq.
20 Chuaq wèq ban mangai loq waq ca Haq,
mahaq raliang đac 'bài mangai ngang dù.
21 Hacùng au anoi 'noh bìac calêu padèch Chuaq;
ngèh dìq ca ngè i chac xech jah dèch bàu manè pôi hiniq hadròih da Haq
trùh hloi hloi ùh hêq.