147
Padèch Chuaq, Jê-ru-sa-lem Khoi Jah Broq Hlài wa Jah Padrŏng
1 Ha-lê-lu-ya! Padràu hau ca Chuaq beq!
Taiq aih bìac lem, calêu manè padèch Boc Plình bèn beq;
taiq aih bìac troq wa lem lình.
2 Chuaq broq hlài Jê-ru-sa-lem;
Haq gop hlài 'bài mangai ma pac lac da Is-ra-ên.
3 Haq broq brêh ca mangai i manoh jìq xa,
wa càt habau da wì haq.
4 Haq rèn dìq ca halŏng,
rèp tang hiniq dìq halŏng aih.
5 Chuaq nhèn joq 'nàng càn caiq wa i cwìang itai dìq dŏng;
can rabiaq Haq ùh dìq ùh lùch.
6 Chuaq jùp đò mangai loq paha'neq dađeh,
broq raliang đac mangai ngang dù loh ta taneh.
7 Calêu manè pôi ca Chuaq beq,
rawêh ranac cràu calêu padèch Boc Plình bèn.
8 Haq chê 'bài lòp plình xam yùc,
padon đòiq mè ca taneh, wa broq ca nhat hon ta bôi wang,
9 Haq am dahwèq caq ca rìm ngè rôm
wa am dahwèq caq ca ac con jò haq catô bòch.
10 Chuaq ùh bùi manoh padren dêh da axêh,
hadai ùh xài ŏi nòi jènh da con calô mangai.
11 Mahaq Chuaq bùi manoh ca 'bài mangai loq crè yùq ca Haq,
wa mangai ngèh gòm can xa-ŏch xam manoh loq waq da Haq.
12 Ô Jê-ru-sa-lem, padràu hau ca Chuaq beq!
Ô Siôn, padràu hau Boc Plình ìh beq!
13 Taiq Haq khoi broq ca long gahlòng 'mang panàt ìh cajap;
Haq am xôq ramŏt ca con caiq pì ŏi enh trom panàt pì.
14 Haq am can catèm ca taneh Diac pì,
broq ca pì jah bình halùih 'mau mì ma yi lem dŏng.
15 Haq 'noh am bàu thê ta crŏng taneh,
bàu Haq cadàu renh dìq jaq.
16 Haq am twiac trùh tìah ca xàc trìu,
rai diac ngom taboc tìah ca blo tanùh.
17 Haq hwenh ca'nìh can hangeo tang ha'nech;
cabô chìuq nui can hangeo da Haq?
18 Haq 'noh bàu thê, hi khoi twiac tajòi 'mòi hech,
broq ca cayeo hlôi wa diac hìu.
19 Haq anoi bàu Haq ca Jacôp,
ranenh wa bàu thê Haq ca Is-ra-ên.
20 Haq ùh lah broq 'màng aih ca jàn leq ma 'noiq;
wì ùh 'nì ca bàu thê da Haq.
Padràu hau ca Chuaq beq!