1 Au tanap bàu ka ƀài gucraq ma oe qne oh daq, au kô hadai gucraq qmang ka wì aih, au kô mangai ma khoe hnoq qmòe kan jìq kan xalep da Christ, mangai ma hadai wiang jah kan ranhòm ma padon trùh kô èh: 2 drah wèq ban tagop da Boc Plình ma khoe thê oh daq, broq yiniq aih ùh xài i cabô panan mahaq taiq kan lem bùi ta manoh, ùh xài đòeq hu yŏc kùng baha ùh hadròeh, mahaq taiq dìq dèh manoh, 3 ùh xài đòeq hu broq bùa ƀài kon trìu enh qneq ka cwìang oh daq, mahaq đòeq broq dua lem ka wì. 4 Jò Mangai ma broq gàu ƀài mangai ban trìu trùh, aih èh oh daq hi jah cadoh diac plình qngah lem, ùh jò leq brôq croh.

5 Hadai qmang aih ƀài mangai qyoh hanam, ep iu tiaq wì gucraq. Rìm ngai ep caxùnh yŏc kan loq hamon rađeh, majah qmang aih Boc Plình tablêq ka mangai loq padèch rađeh, mahaq am xôq ramot ka mangai loq hamon rađeh. 6 Qmang aih, drah qnoh rađeh enh qneq ka tì kŏng i cwìang itai da Boc Plình, đòeq trùh jò dèh jò, haq hi dèch atŏc oh daq. 7 Drah qnèp dŏng ka haq kan yùq crè ta manoh, majah qmang aih haq mangai ma wèq ban pì.

8 Drah loq kèn rai loq clang ka rađeh: Mangai mangai ma tagit ka pì tìah ka baco ka ùm, ti lam dudan ka pì đòeq ti chaq ngan mangai leq haq jah lonh. 9 Ep yòng cajap ta manoh lùi đòeq hu tablêq ka haq, majah qmang aih bèn loq oh daq bèn jàp jìa ta crŏng taneh kô hadai glàm nan no tìah ka bèn. 10 Boc Plình aih xèm da rìm kan tabàih khoe creo ka oh daq trùh ta kan ranhòm mòeq đòe da haq enh dalam ka Jesus Christ, jò oh daq khoe chìuq xalep đò toq biaq, aih èh cla haq raq broq ka oh daq jah gêh geo, hagau hagình rai tah tam paden ka oh daq. 11 Waiq kan i cwìang itai hlài dìq ta haq, mòeq đòe ùh dìq ùh lùch! Amen.

12 Au canòm ka Sinwan, mangai oh daq ùh tablòq manoh, au achìh toq ƀiaq nà kô đòeq hu pariaq oh daq, hu panhìn ka oh daq loq aih joq kan tabàih dech enh Boc Plình, oh daq ep yòng cajap ta aih.

13 Tagop Hadròeh da ƀài mangai jah ràih oe ta Babylôn, i bàu hmàih ka oh daq, kon da au aih Mŏc hanoh qmang aih. 14 Oh daq ep yŏc kan loq waq đòeq hìp hmàih ka dabau.

Waiq kan catèm oe dìq ti oh daq ma oe ta Chuaq Jesus Christ!