1 Qmang aih, pi oe dòh gòm dài nhèn majah dôq cla oe hlài ta Athên, 2 nhèn thê Timôthê, aih bua nhèn, haq aih hapŏng da Boc Plình, mangai patìh ka Bàu lem da Christ, lam ta oh daq, đoèq broq ka oh daq jah cajap rai wiang parông manoh lùi ta oh daq, 3 đòeq ta ƀàikan nanxa qmang aih ùh hìaq i mangai leq dalàc, majah qmang aih cla oh daq hanoh loq trong aih khoe tèu đòeq adroe ka bèn. 4 Ma joq qnàng aih, jò oe ti oh daq, nhèn khoe doe: kô èh ep chìuq bàc kan nanxa, ƀài trong aih manòeq kô khoe trùh, oh daq khoe hnoq. 5 Qmang aih pi dòh gòm hòm, au majah thê Timôthê lam, đòeq huloq ka tình manoh lùi da oh daq qmang leq, au yùq mangai padô qnùt loq khoe padô oh daq, aih èh qngwan qngwaiq ka nhèn khoe abroq xalep đeh. 6 Mahaq Timôthê hlài enh nòe oh daq i anoe ka nhèn loq ƀài tình lem da manoh lùi xam manoh loq waq da oh daq. Haq i anoe oh daq hmàng yôt trùh nhèn, toq ngèh ka jah glàm nhèn, hadai qmang ka nhèn ngèh ka jah glàm oh daq.

7 Qmang aih, oe taqne kan xalep khech rùp da nhèn, nhèn khoe jah kan alòng enh manoh lùi oh daq. 8 Majah qmang aih, manòeq kô nhèn rìh aih taiq oh daq yòng cajap ta Chuaq. 9 Qmang aih, broq qmang leq nhèn ma tôm bàu đoèq hu manè apôi Boc Plình ka oh daq, xam dìq ƀài kan lem bùi nhèn jah enh oh daq ajang ngèa Boc Plình nhèn? 10 Dahì damang, nhèn àu waiq dang haq caqnaih am nhèn jah glàm hòm oh daq, rai qmình tam ajang leq manoh lùi da pì oe raq capòch.

11 Waiq cla Boc Plình, aih Baq bèn, xam Jesus Chuaq bèn qnung aràng nhèn jah trùh ta oh daq! 12 Waiq Chuaq broq kan loq waq da pì tadèch tam rai bình halùih kan loq waq ka dabau, ka rìm ngai, tìah qmang kan loq waq da nhèn am ka oh daq, 13 dôq manoh oh daq jah cajap, jah hadròeh lem ùh i ka nòe cwò enh ngèa Boc Plình, aih Baq bèn, jò Chuaq Jesus bèn xam dìq dŏng mangai hadròeh haq trùh.